Shillong, Naitung, 22: Ki 13 tylli ki Sengbhalang kiba la iakynduh lang mynta ka sngi, ki la shim ia ka rai ban leit iakynduh ia ka Sorkar ban pan jingshai halor ka jingtreikam jong 3 tylli ki Committee kiba la thaw da ka Sorkar ban pyntreikam ia ki jingai jingmut jong ki 13 tylli ki Sengbhalang da ki aiñ kiba pyrkhing ia ka jingwan rung ki mynder ri wat la kam shym la mynjur ban pyntrei kam ia ka Inner Line Permit (ILP). La ong u bah Daniel Khyriem, President ka Khasi Students Union.
Ka sorkar kala shim ia ka jingai jingmud jong ki 13 ki Sengbhalang ha ka jingiakynduh kaba la long ha ka 28 tarik, Iaiong, halor jong kane ka sorkar kala thaw ia ka committee ban peit ha ei lah ban buh ia ki jaka rung jaka mih jong ki briew kiba na bar ha kaba la kynthup ia shibun kit and sorkar ha kaba ia dei bad kane ka kam.
Ha kajuh ka por ka Sorkar ka la thaw ruh ia ka Committee ka ban shong bishar ia ka Bill-Prohibition of Benami Transaction Act 1980 bad ka Meghalaya Regulation of Landlords and Verification of Tenants Bill, 2013 ka ban sa khlieh da u Bah Rowell Lyngdoh uba long u Dy. Chief Minister ban kynthup lang ia u Bah HDR Lyngdoh Myntri ka District Council Affairs nalor ki Ophisar na ka Tnad Political, Law bad ka Tnad Kam Pohiing nalor kaba pynrung dkhot ruh ia ki kynhun bapher bapher kynthup ki Sengbhalang ban ia bishar bniah halor kitei ki Bill.
Nalor kine ki ar tylli ki Committee, ka Sorkar ka la rai ban thaw sa ia ka Committee ka ban shong bishar pat ban pynurlong ia ki jingkular ban thaw ia kawei ka Aiñ ba khlaiñ na ka bynta ban pyrkhing ia ki bar Jylla bad ki Mynder Ri ha kaba ia kane ka Committee yn khlieh da u Bah PBO Warjri, Chief Secretary ka Jylla.
U Samla Daniel u la iathuh ba kane ka jingkynduh kaba mynta ka sngi ka long beit thik tang halor ka jingthaw ka Sorkar ia kine ki lai tylli ki Committee, na ka liang jong ki 13 tylli ki sengbhalang ki kwah ban ia kren bad ka sorkar halor kane ka bynta ha kab ai dei ba dki committee bapher bapher na ka bynta ban teh la kam ia ka jingwan rung wanmih ki mynder ri ha kane ka jylla.(SP News)
