Shillong, Nohprah 17: Ki paidbah jong ka Ri Lum Garo kaba kynthup ia ki seng bhalang bapher bapher ki la kyntu ia ka seng lehnoh ANVC(B) ba kin weng noh ia ka jingkhot pakhang shnong ka jong ki kaba ki la buh ha ka 20 tarik mynta u bnai, ia kane ka kynhun jong ki paidbah la tip kum ka the People’s Movement for Democratic Rights (PMDR).
Ha kane ka jingkyrpad ki paidbah ki la ong ba “ Ngi ki paidbah jong ka Garo Hills ngu da kyrpad rit ia ka seng ANVC(B) ba kan sngewbha ban weng noh ia kane ka pakhang shong kaba ka la khot ha ka 20 tarik mynta u bnai” kane ka long katkum ka jingpyntip jong u Vice Chairman ka PMDR u Lalnunthari D. Shira.
Kane ka jingkhot pakhang shnong da ka ANVC(B) kan wanrah ia ka jingbym shong suk shongsian khamtam ha kane ka por leh kmen Christmas. Na ka liang jong ka seng ka kyntu ia baroh ki seng lehnoh ba kin sangeh kane ka jingialeh ka jong ki khamtam ha kane ka por leh niam kaba khrawtam ha ka jinglong khristan.
Ha ka juh ka por na ka liang jong ka PMDR ka kyntu ia ka sorkar ba kan pynsangeh ia ka jingthwet ia ki seng lehnoh baroh kiba don ha Garo Hills tang ha kane ka por khristmas ha kaba ki paidbah ki don kam ia ka jingsuk ban ioh pyndon burom da ka jinglaitluid kaba khlem syier ha kane ka khristmas.(SP News)
