Shillong, Naiwieng 25:Ka LSSSCC ha ka 24 Naiwieng 2012 ka la Plie pyrda ia ka Social Sports Meet na ka bynta ki Khun Samla bad kumjuh ruh na ka bynta jong ki Hep kiba rit kiba dei kiba shong ba sah ha ka Shnong Lyngkien Shyiap, Mylliem Lum kum shibynta ban leh kmen bad ban pyn proh ka jabieng shipor hadien ba ki la kut ia ki Examin ki jong ki bad kumjuh ruh ban kyntiew ia ka Sap ka Phong kaba u Blei u la kyrkhu kyrpang halor jong ki. Ha kane ka Sngi la Plie pyrda ia kiba bun jait ki jing ialeh kai kiba la pyn byrngia ym tang ki ki samla bad ki hep kiba rit.
Kiba la iashim bynta hynrei kaba la khring ruh ia shibun ki Piadbah Nong Shong Shnong jong ka Shnong Lyngkien Shyiap ban ia Tuid sha ka Madan kynjatball jong ka Shnong Lyngkien Shyiap, Mylliem Lum namar ki la don shibun ki jing ialehkai kynthup ia ka Football, 300 Meter race, High Jump, Long Jump, Short Put, Musical Chair, Tag of War, Sack Race bad Tie-Breaker.
La Plie pyrda ia katei ka Social Sports Meet da u Kongsan hapdeng ka jingialang kaba iphuh iphieng ba la pynshongshit da ki jing rwai ba sngew thiang na ki Khynnah skul jong ka L.P.School ban pdiang burom ia u Kongsan Bah Karmel Stone Sohtun MDC, Laitkroh, Symbud Kongsan Bah M.B.Kharlukhi President Hima Mylliem Youth Welfare Organisation bad u Samla Kitboklang Nongphlang (State Youth Awardee) & Member ka Advisory Committee on Youth Programme NYKS, Ministry of Youth Affairs & Sports, Govt. of India kum u Special Guest lem bad kiwei kiwei de ki Kynrem ki lyndan ha kaba na ka liang jong ka Hima Mylliem la wan ban mih khmat da u Myntri jong ka Kur Warjri ha ka jing ia don ryngkat u Rangbah Shnong, Secretary Shnong lem bad ki Dkhot ka Executive Committee jong ka Dorbar Shnong Lyngkien Shyiap, Mylliem Lum.
Ha katei ka jingialang na ka Liang jong u Symbud Kongsan Bah M.B.Kharlukhi u la noh synniang da ka Pisa Rs.5000/- (San Hajar Tyngka) kum shibynta ban ai mynsiem ia kane ka Kynhun jong ki Samla ha ka Shnong Lyngkien Shyiap, U Bah Karmel Stone Sohtun MDC, Laitkroh haba kren kum u Kongsan ha ka jingialang u la ong ba wat la ka jing ioh Scheme kum u MDC ka long kaba rit bha hynrei na ka liang ka jong u un ialeh kat lah kat iai ban thaw ki lad ki lynti ban ioh pynbha ia ka Madan ialehkai ha ka Shnong Lyngkien Shyiap hynrei u ong pat ba kam pat don jingmut satia ban shu Put Turoi ha kane ka Rynsan bad u la kyntu ia ki piadbah ba kin iai shah lang shipor bad u kum u MDC tad haduh ban da ioh ban pynurlong ia katei ka jingangnud ha kajuh ka por u la ai khublei kyrpang ia u Samla Kitboklang Nongphlang kum u shah khot kyrpang ha kane ka sngi da kaba ong ba u long u Samla uba trei shitom bad uba la trei borbah ha ka Thain Mylliem bad ha ka Jylla hi baroh kawei ban kyntiew ia ki Samla ha kiba bun ki liang. (SP News)
