Shillong, Kyllalyngkot 13: U President ka Hynniewtrep National People Federation (HNPF) East Jaintia Hills District Cicle, u Samla Marchal Biam u ong ba ki lai tylli ki Sub-centre jong ka Health Department ka sorkar jylla, kata Sunapur Nein, Ratacherra bad Huroi Hangaria Sub-centre, kiba mynshwa ki treikam bha, hynrei mynta la jan dap shisnem kine ki Sub-centre ki la shu khangtala sah khlem da plie ia ki bad ka jingkhangtala ka sorkar khlem da pyntreikam ia kine ki Sub-centre ka wanrah jingeh shibun ia kiba pang ba shitom ha ka liang ki dawai ki dashin na ka bynta ka jingkoit jingkhiah jong ki.
Shuh shuh u samla Biam u ong ba ha ka jingleit jurip ki dkhot jong ka Seng (HNPF) hynnin ka sngi (12/01/2013) la shem ba kine ki Health Sub-centre ki dangsah hi ha ka jingkhang tala naduh ba la khang ia ki naduh u bnai April mynshem snem. Shuh shuh la ong ha ka jingiadei bad kane na ka liang jong u Rangbah shnong ka Sonapur ma Saidring Lamare u la ud bun bun sien sha ka Sorkar ba dei peit ia kine ki Sub-Centre, hynrei pat na ka liang ka sorkar ka la shu sngap mynthi ia kane ka jingud jingnam jong u na ka bynta ka jingmyntoi jong ki bapang kiba nuin.
Na ka liang ka HNPF ka la dawa ba lada ka sorkar kam plie bad pyntreikam ia kine ki Sub-centre hapoh shibnai, ka Seng kam banse ban pynlong da ka jingiakhih kaba tyngeh na ka bynta ka jingmyntoi kiba pang kiba nuin. Shuh shuh u Samla Biam haba u la ong ba ka Seng ka la leit ia kynduh ia ka Dr. ba dei peit ia kine ki Sub-centre, ka Dr. Getanjali Biswal, hynrei na ka liang jong ka kam shym la ai kano kano ka jubab ia ki dkhot jong ka Seng halor kane ka jingkhangtala jong ka sorkar ia kine ki Health Sub-centre.
