Jowai, Kyllalyngkot 02: Lyngba ka RTI na Saipung Block ba pan ha ka 29/10/ 2013 , ka KSU Myntriang Unit ka la lap ia ka jingbam klop u Rangbah shnong/secretary VEC Ma Wolding Lamurong, lem bad ki briew sorkar ia ka pisa ba 5,14,900 tyngka na ka skim NREGS , ba dei jong ka shnong Myntriang, ha ki snem 2010 – 11 bad 2012 – 13. Halor kane ka phang, ha ka Dorbar shnong ba pan da ka KSU ha ka miet 30/12/2013 ba ia don lang ryngkat ki Dkhot bad nongkitkam ka seng, la iohsngew ia ka jingpynshai da ka seng ia ka jingioh skim NREGS ki paidbah naduh ki snem 2008 bad haduh u snem ba mynta bad ruh ia ka rukom pyllut bad jingjah jong ka pisa.
Hadien ka jingtohkit kaba bniah, u Rangbah shnong ba mynta(uba long u Secretary ka VEC ha ki snem 2010 & 2011), u la phla hakhmat ka Dorbar bad ki dkhot ka seng, ba ha u snem 2010 -11, ka shnong ka la ioh ia ka Work Order ba mang 6,46,600 tyngka tangba u pynpaw sha ki paidbah ba la ioh tang 3,88,000 tyngka(Wages) da kaba buhrieh 2,58,600 tyngka ba la mang ban thied tiar(Materials). Bad na ka bynta u snem 2012 – 13, ka shnong ka la dei ban ioh 7,32,460 tyngka, tangba u la pyntip ba ka shnong ka ioh tang 4,67,160 tyngka (Wages) bad khlem pynpaw ia ka 2, 56, 300 tyngka(Materials).
Haba khein lang tang ia kaba paw, ka jingjah ka pisa na ka NREGS jong ka shnong Myntriang ha kitei ki snem ka long 5,14,900 tyngka. Na kane ka 5.14 lak, u la phla ba u la siew 70,000 bad 81,000 tyngka sha ka OPhis(Exe. Engineer) ban pyllait pisa ha kitei ki snem da ka jingpan jong ki briew na ophis bad ruh 50,000 tyngka na ka bynta ban ioh ia ki Muster roll ba thymmai.
“Ka dorbar shnong Myntriang ka la aipor ia u, haduh ka 30 tarik u June , ban siew ia ka 2,53,000 tyngka bad ka seng kan sa leit ujor sha ki bor bahalor(BDO ba mynta/DC/ ki bor sorkar C&RD) ban leit tohkit ia kane ka kam bamklop ia ka pisa ba dei na ka bynta ka jingmyntoi ki rangli ki juki bad ban kem bad pynshitom ruh ia baroh kiba donkti khamtam ban ioh biang ia ka pisa ba la jah”, la pynpaw u Education Secretary ka KSU Myntriang Unit, u Ma K. Tangliang.
Kane ka jingthok jingshukor ia ki paidbah ba lui lui ka shnong, ki bym tip ia ki kam ba sha lyndet jong utei u Rangbah ka long ka jinglehrain ia baroh khamtam ia ka jingdonkti ki katto katne ki briew sorkar ban hikai bamklop bamsap wat ia ki nongkitkam shnong. Kum ban shu pyndonkam, ba ka don ka jingkob ia dat bad ruh ia ka jingpyrshah/pynbor ban weng ia ka RTI ka seng na utei u Rangbah shnong ha ki bnai ba la dep.
“Ka seng ka pynpaw ia ka jnglyngngoh ba kumno ka OPhis jong ka Saipung block, lyngba u Gram sevak bad BDO barim ki ai(withdraw) ia ka pisa sha utei u secretary VEC khlem ka jingpyntrei bha ia ka kam bad khamtam ia ka jingbym leit jngoh(Inspect) ban peit bniah jong ki ia ka kam? ”, ka kyrwoh na ka KSU Laskein Circle.
Ka seng kan ym ailad ne iaishah ia kum kine ki kam bamsap bampong ban suhthied ban pyntroin ia ka roi ka kiew ka thain khamtam ka jingpynhiardor ia ka imlang sahlang , hapoh ka shnong bad ka jaidbynriew hi baroh kawei , bad ka jingai nuksa ia kiwei ban bamklop ia ka hok ki paidbah baroh lang.(SP News)
