Jowai, Iaiong 24: Ka AJYWO Central Body, ka maham jur ia ki katto katne ki dukan kiad (wine store) ha East Jaintia Hills District kiba ba plie palat ia ka por ba ka sorkar ka la buh ha ka juh ka por, kane ka seng ka la byrngem jur ruh ia kiba kum kita ki dukan kiad ban leh ia ki da kaba tyngeh kat kum ki kyndon jong ka ain lada ka dang lap ia ki nangne sha khmat.
“Ngi la lap ba don katto katne ki dukan kiad (Wine Store) hapoh ka East Jaintia Hills District kiba shait plie miet palat ia ka por kaba ka sorkar ka la buh bad mynta ngi dang peit ngor ia ki bad lada ngi dang lap ia ki ba ki dang leh kumne nangne sha khmat hadien jong kane ka jingmaham, ngin leh ia ki da kaba tyngeh kat kum ki kyndon jong ka ain” ong u Bah M H Dkhar President jong ka AJYWO Sengkmie.
“Ka jingjyllei palat jong ki dukan die kiad naduh ki winestore haduh ki dukan die kiad beain ha East Jaintia Hills District, ka la buh iaka imlang ka sahlang bad khamtam ka Ri bad ka Jaidbynriew rit paid bad ba dang sahdien jong ngi ha ka jingma ka ba khraw. Ka tynrai bah jong ka jingsniew ba har rukom ha ka imlang ka sahlang ka dei na ka kiad.” la bynrap shuh shuhu Bah M H Dkhar.
U tei u nongialam jong ka AJYWO u la ong shuh shuh, “Don shibun ki longing long sem, ki briew shynrang bad kynthei kiba la jot noh ha ka jingdih kiad ha East Jaintia Hills District. Ka jingjyllei ki dukan kiad ha EJHD naduh ki winestore haduh ki dukan kiad beain ka la kylla long ka jingtim ka ba khraw ia ki khun samla jong ka thain kiba ha ka jingshisha, ki dang dei ban pynleit ia la ki jingmut jingpyrkhat bad ka por ha ka pule puthi hynrei ki la shah pynjot pynban ha ka bor jong ka kiad bad kane ka la ktah shi katdei eh ia ka lawei jong ka Ri bad ka Jaidbynriew jong ngi.
Ka AJYWO ha kajuh ka por ka kyntu ruh ia ki bor ba dei peit jong ka sorkar (Excise Department) ban peit ngor ia kane ka jingplie palat por ki katto katne ki dukan kiad ha EJHD bad ruh ban pynduh jait noh ia baroh ki dukan kiad beain ha East Jaintia Hills District khamtam ha shilynter jong ka NH 44 na ka bynta ka bha ka miat jong ka imlang ka sahlang bad ruh ka lawei ba phyrnai jong ka Ri bad ka Jaidbynriew. Kaba phylla shuh shuh ka long ba don bun ruh ki dukan kiad beain ha EJHD ki ba la pyniaid da ki bar jylla bad nongwei.
U kyrwoh na ka AJYWO u la ong shuh shuh ba halor jong ka jingjyllei pat de jong ki wine store ha baroh arliang jong ka NH 44 khamtam ha EJHD, ka AJYWO kan buddien ia ka hukum jong ka Ministry of Road & Transport (MoRTH) jong ka sorkar India kaba hukum ban pynduh pyndam noh ia ki wine store kiba don ha ki National Highway bad shen kane ka seng kan sa leh ia kaba donkam ha ka jingiadei bad kane ruh.(SP News)
