Tura, Naitung 26: U pulit jong ka jylla Meghalaya naka kynhun commando Abhijit Mazumdar u la mynsaw ha ka jingshah siat ha ki riew kieng atiar 7th mile ha kaba ki riew kieng atiar kila pyrshang ban rah bor ia u wei u pulit.
U Mazumdar bad u paralok jong u u Rana Chakroborthy, u ba dei u nonghikai katba ki dang iaid ha ka bike ki riew kieng atiar kila mih kynsan bad pyrashang ban rah bor ia u nonghikai kane kala jia ha ka por kumba 10:00 – 10:30 baje mynstep.
Kine ki riew kieng atiar kiba la leh ia kane ka kam ki don kumba san ngut bad kila pyrshang ban rah bor ia u Rana ha kaba u Abhijit u la pyrshang ban iada hynrei kine ki riew sniew kila siat ia u bad mynta u don hapoh Civil Hospital Tura ban sumar.
U Mazumdar u la shah siat na sha dien bad u la ioh lad ban phet sha khlaw la ong u SP Ka west Garo Hills bad ha dien la shem ia u. U ne u nonghikai u ba la shah rah bor u dei u ba dang leh ia ka PhD ha North Eastern Hill University, Tura campus.
U Mazumdar, u ba dei u commando jong ka 5th Meghalaya Battalion u don ha pdeng ka shuti bad u dang ia leitkai bad u ne u paralok jong u ban leit sha shnong ha Barengapara, ha jan Dalu.
U Inspector general ki pulit (operations), u G H P Raju u la ong ba u Mazumdar u la pyrshang ban pynlait ia u nonghikai kum u pulit ba shisha. Ka jingkhynra ha katei ka jaka ka dang iaid sha khmat ban pynlait ia u nonghikai.(SP News)