Jowai,rymphang,12: Ka Seng Hynniewtrep Achik Natioanal Movement (HANM) Jaintia Hills Unit, kan pynlong ia ka jingialang paidbah ha Community Hall jong ka Khliehriat West kaba don ha East Jaintia Hills District ha ka 15.02.2014 ha ka por 10:30.
Kumta ka seng ka khot ka wer ia baroh ki nongshong shnong jong ka Jaintia Hills East bad West ban ia poi khnang khnang sha katei ka jingialang paidbah na ka bynta ka daw bah daw san jong ka thain baroh kawei, kum ban shu pynkynmaw ka seng ka la ju leit dawa na ka sorkar ban maramot ia ka surok NH 44 kaba la sniew shi lynter naduh Mookyndur ter ter shaduh Malidor.
Shuh shuh ka jingsniew jong kane ka surok kala ktah shikatdei eh ia ka kit ka bah ka leit ka wan khamtam ha ka pang ka shitom kiba la hap ban sah kut lynti tang na ka daw jong ka jingsniew palat jong kane ka surok, namar ba kane ka surok ka dei u budlum jong ki jylla ka thain Northeast baroh kawei, kane ka surok ka hap ban pyniasoh shi bun ki jylla hapoh ka thain Shatei Lammihngi jong ka Ri.
Kumta ka seng kane ka dei sien kaba ar ba kan shim ia ki lad jingiakhih ba jai jai, ka seng ka la dep pynlong ia ka jingpyndeng Lama Iong halor kane ka juh ka mad jingdawa, kane ka dei ka sien kaba khadduh ba ka seng kan ia khih da kaba jai jai bad lada jia ba ka sorkar kam sngap ia kane ka jingdawa ka seng kam banse ban shim da ki jingiakhih kiba tyngeh ban pynpei shkor ia ka sorkar, halor ka jingkuman jong ka ia ki jingeh u paidbah, pynkut ka kyrwoh na u Shaniah Suchen President HANM, Jaintia Hills Unit.(SP News)
