Mawsynram, Nailar 22: U Chief Executive Member ka Khasi Hills Autonomous District Council (KHADC) Bah Ardent Miller Basaiawmoit, ula kynnoh ba ka jingmih ka jingia umsnam kaba dang shu jia shen halor ka jingshah thombor iaki nongrep na ka shnong Thyllaw ha ki katto katne ngut ki briew na Mawlyngbna ka dei namar ka jingleh sting bad ka jingbuhteng da ki nongmihkhmat kiba mynshwa ba kane ka kam kan poi shaduh une u pud.
Haba kren ha ka jingialang kaba la long hapoh ka shnong Thyllaw bad ruh ha Mawlyngbna, ha ryngkat ka jingdonlang u Deputy CEM ka KHADC Bah Teinwell Dkhar, Bah Adelbert Nongrum, Bah Ian Swer SDPO Sohra, Bah Alex Mukhim Magistrate lem bad ki nongialam jongki artylli ki Hima kata ka Hima Dwara Nongtyrnem Bah Arwanphai Wanshnong bad Mawsynram Paiem Amos Malniang, u Bah Ardent ula pynpaw ba ka jingmih kum kitei kiei kiei baroh ka dei namar ka jingbym shimkhia bad leh bym suidniew da ki nongmihkhmat kiba mynshwa, namar ba kane ka case kala don naduh mynshwa hynrei na ka daw ba kam don ka jingshimkhia na ka jingpang kaba rit ka sa poi shaduh une u pud.
Shuh shuh ula kynthoh ba ka jingdon kiba leh politic ka wanrah iaka jingiapait iapra shi iing shi sem, ka shnong ka thaw, ka hima iaka hima bad kumta ter ter, bad ia kum kine ki jait briew kiba leh politic bad kiba pynlong langknia iaki paidbah ka long kaei kaei kaba shyrkhei.
Haba pynshai sha u paidbah jong baroh atylli kitei ki shnong ula ong ba ka jingwan ka jongu kam dei ba u kwah ban pynbeit noh mardor ia u pud u sam uba kine ki nongrep jongki artylli ki Hima ki iaknieh hynrei u wan ban wanrah shwa iaka jingshongsuk shongsain bad ban tem shwa iaka jingiakynad hapdeng para maki bad ban sa pynbeit pat ia u pud u sam hadien. Nalorkata ula pynshai ba u wan haduh kitei ki jaka ba u kwah ban iohsngew ba kaei ka daw ba la pynlong ba kane ka jingjia kan poi shaduh ak jingiaumsnam.
Shuh shuh ula kren ha baroh artylli ki jingialang kaba la pynlong hapoh ki shnong ula pynpaw ba ka Council kada thrang da shisha ban ym iohi shuh iakine ki jingeh bad ka jingiaumsnam bad ula kyntu ban iatreilang bad ka, na ka bynta ban weng ia kane ka jingeh bad ban sa ai ka jingbishar ka bym shah liang na ka bynta ban wanrah ka jingsuk ia baroh arliang.
Haba kren na ka liang u Bah Bhanusib Rnga, Assistant Secretary ka Warding Farmer’s Association (WFA) ula pynpaw ba ka dawbah jongka jingmih ka jingiaumsnam ka dei ba ka don ka jingleh Politic dano re dano. Haba ula kynthoh ba lada u MLA/MDC uba shimkhia ula dei ban wan kren eiei halor kane. Ula kynnoh ruh ba ka daw imat ka dei naduh ba ki wanrah ia u Pipe Um uba ki ioh na ka tnad Water Resources kaba kila sam bad klun iaki jaka rep jongngi ki nong Thyllaw.
Shuh shuh ula pynpaw ba ki Pulit ka Mawsynram PS ki noh palat ka tarajur sha ka shnong Mawlyngbna watla kila dep ban ujor FIR la 10 tylli ki Case hynrei kam don kano kano ka jingshimkhia ban kem iaki briew kiba shoh ba dat, kiba leh ki kam be-aiñ.
U Bah Rnga ula kynnoh ba kane kaei kaei baroh ka mih ka jingiaumsnam ka dei na u Syiem ka Hima Mawsynram uba la ialam bakla iaki paidbah. Shuh shuh ula pynpaw ba ka jingshah thombor iaki nongrep na ka shnong Thyllaw ka dei ka jingleh ia kum ki Mrad ym shuh kum ki para briew.
Na ka liang utei u nongialam ka WFA ula pynpaw ba mynshwa kala don ka jingiarep suk rep sain ha katei ka jaka kaba la tip kum ka Rithang hynrei na ka daw ba ka don ka jingleh politic tang na ka bynta ban shu kwah klun da ka bor iaki jaka rep ban bsuh ia kitei ki pipe Um ka sa poi shaduh une u pud.
Katba na ka liang u Bah Dilondar Marwein General Secretary Seng Khasi Mawlyngbna uba dei ruh u nongrep na katei ka shnong ula pynpaw ba kane ka dei ka sien kaba nyngkong ba kan don kum kane ka jingiaumsnam kaba mynshwa ka don tang ka jingiarep suk rep sain. Hynrei ka dei tad mynta u snem kane ka jingkynad kala don. Ula kyntiat ba ki khlem thombor bad kila pynpaw ba ka jingkynnoh ka dei kaba lamler. Shuh shuh ula pynpaw ba lada ym lah ban pynbeit mynta ia katei ka jaka ka jingma ka dei ha ka por kheit iaki mar rep kata ha ka por Tlang.
Na ka liang u Bah Ardent hadien ba ula iohsngew ia baroh artylli ki jingpynshai ula khot ban iakren ia baroh ki nongialam jong kitei ki artylli ki shnong ba kin wan ban iakren hapoh ka ophis treikam jongu la sngi nyngkong ka taiew (25.8.2014) na ka bynta ban lah ban weng ia u sohkhyrdot uba don ha ka jingia umdum.
Shuh ula kyntu ba kim dei ban don ka mynsiem ka jingiakput hynrei ba kin kiar na ka jingshim iaka aiñ ha ka kti, da kaba ula ong, “Lada phi leh iakaba dei bad phi shah thombor ngin ai ka jingiada iaphi bad ngin pynshitom iakiba leh pyrshah, hynrei lada phi leh iaka bym dei ngin pynshitom da kaba ai da u dieng sympat,” ula bynrap bad lada don kino kino kiba leh pyrshah ia ka jingiarai paidbah mynta ka sngi yn kem beit nyngkong iaki nongialam.
Lah ban kdew ba ki nongrep na Mawlyngbna kila hiar da ka shnong sha katei ka jaka rep iaka ba la tip kum ka Rithang bad ki dnag thmu ba u CEM un wan ban pynbeit noh shisyndon ia u pud u sam, hynrei na ka liang u CEM ula pynshai ba kin weng shwa iaka jingkynad bad kin sa leh ia u pud u sam bad ban leh kham kloi.(SP News)
