Pynksan ka iing bishar ia ka KHADC pyrshah ia ka kong Deoris

Shillong, Naitung, 22: Ka Ingbishar jong ka Meghalaya High Court ka la pynksan ia ka Khasi Hills Autonomous District Council (KHADC) halor ka jingkhang tala ia ki dukan ba longtrai da ki Khasi ba la shim wai da ki bar jylla kiba shu khaii khlem don ka Trading License.

Ka kong Deoris Marbaniang ka la mudui da ka mukotduma pyrshah ia ka KHADC halor ka jingkhang tala ia ki dukan jong ka  kiba don ha Bara Bazar, Iewduh, Shillong halor ka nongrim ba i dei ka trai jylla bad ym donkam satia ban da ioh ia ka Trading License na ka KHADC bad kynnoh ruh ba ka tnat Khaii jong ka KHADC kam shym la ai satia ia ka Show Cause Notice kaba 30 sngi bad ka Closure Notice kaba 45 sngi shwa ban khang tala ia 9 tylli ki dukan jong ka.

Haba ia dei bad kane ka jingujor ka iing bishar kala  ka la pynksan ia ka KHADC, halor jong ka nongrim ka Section A bad Section B jong ka Khasi Hills District Council (Trading by Non-Tribal) Regulation 1954 kaba kren shai ba ‘kino kino ki Khasi  kiba aiwai ia ki dukan sha ki bar jylla kin hap ban shim ia ka Trading License na ka KHADC.

U Bah Latiplang Kharkongor, Executive Member ba peit ia ka tnat Khaii haba kren sha ki lad pathai khubor u la ong, “ka jingkhang tala ia ki dukan jong ka Kong Deoris Marbaniang, ka long hadien ba ki bar jylla kiba shim wai ia ki dukan jong ka , kim shym la ai jubab satia halor ka Show Cause Notice bad ka Closure Notice ba phah da ka KHADC.  Hynrei ha ka jaka ban ai pynshai sha ka KHADC, pynban ka trai dukan ka la leit mudui sha ka Ingbishar.”

“Nalor kata ka kong Deoris kala kam ba ki bar jylla kiba shong ha kitei ki dukan jong ka  ki dei tang ki nongtrei,” ong u Bah Latiplang bad bynrap, “hynrei lada ki dei ki nongtrei kumno ki don pat wat tang ia ka Labour License,”

“Ngi khlem leh khlemakor iano iano ruh bad ngi la ailad ia baroh ban jubab ia ka Show Cause Notice kaba 30 sngi bad ka Closure Notice kaba 40 sngi pynban, i Kong Deoris i ong pynban ba ym shym la Notice ei ei na ka KHADC,” ula ong. U iathuh ba ki dukan kiba don ha shilynter ka surok G.S Road ki dei kiba dang hap hapoh u pud u sam ka KHADC, kata haduh lad Umsohsun.

“Ngi suba ba kane ka jingkiew inglieh ingsaw jong ki Khasi kiba long ki trai dukan ka dei ka jingkyrshan jong ki bar jylla tang ban myntoi ialade,” ong u Bah Latiplang.

Ki don haduh 66 tylli ki dukan ba la shimwai da ki bar jylla na ki Khasi kiba la shah khang tala ha ka KHADC bad na kine tang 3 tylli la ailad ban plie biang hadien ba la pynshisha ba ki trai dukan ki dei hi ki Khasi hadien ba ki la iasoi soskular iasngewthuh jingmut bad ka KHADC ban aiwai ia ki dukan tang sha ki trai ri trai muluk.(SP News)

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet