Shillong, Kyllalyngkot, 15: Ka High Court jong ka Meghalaya, Shillong Bench ka la rai pynrem ia ka Dorbar Shnong Shella hapoh ka jingialam jong u Bah Tobias Tiewdop, Secretary ba la shah sospon mynta, uba la pynmih ia ka rai tait shnong ia u Bah Kondro K. Ksanlah, uba long u Executive Member ka Dorbar Shnong Shella.
Haba bishar bniah ia ka Dorkhas ba la ujor da u Bah Kondro K Ksanlah, u Justice SR Sen ha u Naiwieng jong u snem baladep u la pynpaw ba ki kyndon ne ki aiñ jong ki Dorbar Shnong ki dei kiba la thaw na ka bynta u paidbah bad ym da ki paidbah na ka bynta ka Dorbar.
Ha kaba iadei bad kane ka rai tait shnong, u Bah Ksanlah u la ujor da ka dorkhas sha ka High Court ha u Lber, 2012 bad kynthoh ba ia kane ka rai tait shnong ba la hukum da ka Dorbar Shnong Shella hapoh ka jigialam jong u Bah Tobias Tiewdop ka long pyrshah ia ki kyndon treikam ka Dorbar.
“Lada ia ka Dorbar la thaw na ka bynta ka bha ka miat ki paidbah, namar kata, ka dei ruh ka kamram jong ka Dorbar ban peit ia ka bha ka miat jong ki paidbah bad ban pynbeit ia kito kiba leh bakla,” ong u Justice Sen.
Une u Nongbishar u la pynpaw ba ka jingkhanglad iano iano ban long u dkhot ka Dorbar kam dei satia ka rai kaba bha, namar kata u la hukum ia ka Dorbar Shnong Shella ban ailad ia u bah Ksanlah (nongujor) ban iashim bynta ha ka Dorbar.
U Justice Sen ula bthah ia u Nongujor ban ia bha ia miat bad kiwei pat ki dkhot bad ban bud ia ki kyndon pyniaid jong ka Dorbar.
Haba ai ia ka Stay Order halor kane ka mukotduma, ka Ingbishar ka la kdew ba jingtait shnong ka dei ka jingpynkhein ia ka kyndon jong ka Article 19 (e) bad 21 jong ka riti synshar ka ri India.
Haba pynksan ia kane ka Rai jong ka Ingbishar, u Bah Ksanlah u la ong ba ka rai ban tait shnong ia u ka long pyrshah wat ia ka kyndon treikam jong ka Shella Confederacy ia kaba la thaw naduh u snem 1920.
“Nga la ujor da ka dorkhas ym na ka bynta ka jingiada ia nga shimet hynrei na ka bynta 69 ngut kiwei pat ki dkhot ka Dorbar Shnong kiba la shah tait shnong bad kiba long ki nongshong shnong bapura jong ka Shnong Shella ban lait na kane ka jingsynshar badonbor jong ki nongialam shnong,” ong u Bah Ksanlah haba kren sha ki lad pathai khubor ha ka sngi palei.
U Bah Ksanlah u ai khublei ruh ia ki dkhot jong ka Dorbar Shnong ba mynta, hapoh ka jingialam jong u Bah Bostarwell Ora, Acting Secretary bad ia ka Dorbar Hima jong ka Shella Confederacy, ia u Bah M. G. Jeengap, Ex-Secretary ka Dorbar Shong Shella, Bah Wallam L. Mawphlang, Acting Wahadadar na ka bynta ka jingkyrshan lem jong ki ia u.(SP News)
