Nongpoh, Nailar 19: U Bah Donkupar Sumer M.D.C jong ka Umsning Constituency bad kumjuh ruh uba long u Executive Member ba peit ia ka Iew ka Hat U la sam ia ki Tiar Shet sha ka Dong Sohmylleng kaba hap hapoh ka shnong Umdihar kaba ha Ri Bhoi District.
Ha katei ka por la ia don ryngkat lang ki President, Secretary, ki Samla, ki Longkmie bad ki Rangbah jong kane ka Dong.
Haba kren ha kane ka sngi U Bah Donkupar Sumer U sngew ba wat lada U long tang kum u M.D.C hynrei U la lah pat ban ai ia ki jingiarap sha ki paidbah bad ki shnong bapher bapher kiba hap hapoh ka Constituency ka jong U.
U lah kyntu ruh ia ki Paidbah jong kane ka dong ba kin sumar bha ia kine ki tiar khnang ba kin lah ban pyndonkam ia ki na kawei ka por sha kawei pat.Kumjuh kum u Nongialam U sngew ba dang bun ki Shnong kiba hap hapoh ka Constituency ka jong U ki dang long kiba dang sahdien.
U la ong ruh kum Nongialam un trei katba lah khnang ban ioh rat dyngkhong noh ia kane ka jingsahdien bad ban wanrah ia ka Umsning Constituency kaba phyrnai bad ba kan long artad kum ka nuksa ia kiwei pat.(SP News)
