Shillong, Iaiong, 15: Ki paidbah jong ka shnong Mawkdup kila hiar sha ka shnong Wahswat ban pynpra ia ki saw tylli ki iing kiba don ha katei ka jaka ha kaba ki long iing kiba la shah leh ha kane ka jaka kila duh ia ka iing ka sem bad mynta kim don jaka suh tang ban sah.
Ka daw baroh jong kane ka jingshah pynpra ki tei ki iing ka dei na ka daw ba ka don ka jingiaknieh jaka hapdeng ka Raid Tynring. Kane ka jingia knieh jaka kala poi haduh ka jingiakiew ienglih ingsaw, wat la ka iing bishar ka la ai ia ka rai hynrei ki briew ki bym don shuh ia ka jingburom ia ka iing bishar kila leit ban pynpra ia kitei ki iing ki sem.
Kane ka jingshah pynjulor bad pynjot naphang ki jingdon jingem jong kine ki saw tylli ki longing ka long namar ba ka Ingbishar ka la rai pynksan ia ka Raid Tynring ha ka 31 tarik, Lber, 2014, kaba ioh ia ka nongkynti ban kam trai ia katei ka jaka, kaba la pynkhie bitar ia ki paidbah Mawkduk pyrshah ia kane ka rai jong ka Ingbishar.
Kine ki saw tylli ki ing kiba la shah pynjot dusmon ki kynthup ia ka ingsah jong u Bah Drome Nongrum, Kong Skhirmai Nongrum, Bah Koslin Mynsong bad ka ing jong u Bah Thnowel Lawai.
Ka kynhun ki nongthoh khubor kiba la hiar sha katei ka jaka, ha ryngkat ka jingiadon lang i Kong Agnes Kharshiing, President ka CSWO bad Poonam Yadav, kaba la long ka Nongsaidaiñ, ki la sakhi da la ki jong ki khmat ia kine ki jingshah pynjot bad shah pynjulor jong kine ki saw tylli ki longing kiba dang im mynta hapdeng ka jingbym suk mynsiem bad ka jingsyier mynsiem.
Ka kong Skhirmai Nongrum, i la ong ba ha ka step jong ka sngi ba-ar, ki la leit ujor da ka ejahar sha ki pulit ka Khapmara Out Post, Ri-Bhoi District.
U Bah Drome, u la iathuh ba kane ka jingiakynad ka la sdang naduh u snem 2001 bad hadien khatsaw snem ka Ingbishar ka la rai pynksan ia kine ki saw tylli ki longing halor ka jinglong trai ia katei ka khyndew kaba ki shong ki sah bad ki rep ki riang haduh mynta.
Ha ka ejahar kaba kine ki saw tylli ki longing ki la ujor sha ki pulit, ki la kdew ruh ia ka kyrteng kiba donkti kiba kynthu ia u Bah Wanches Nongdhar, Bah Jrek Mylliem Marbaniang, Bah Kyrdon Shylla kiba na Mawkduk bad u Bah Kyrson Kharkongor bad ia u Bah Krot Kharshiing kiba dei na ka shnong Lumdiengngan.
U Bah C.A Diengdoh, Sordar ka Raid Tynring, haba kren ha u Nongthoh khubor lyngba ka Telephone u la iathuh ba kine ki saw tylli ki longing ki dei hok ki trai khyndew namar ki ladep thied ia kane ka jaka da ka umsyep ha kaba ki la shna ing bad long ruh ki nongshong shnong bapura ka Raid bad im ruh da ka rep ka riang.
“Kum u khlieh nongsynshar ia ka Raid, nga pynrem jur ia kane ka kam riewkhlaw bad khamtam ia u Bah Wanches Nongdhar, uba long u Nonghikai skul ha Lumkseh uba ju kam ialade kum u Self Style Rangbah Shnong,” ong une u Sordar Shnong.
“Ki pulit ki dei ban tohkit, mano ba donkti ban pynshoit ia kane ka jingiakynad bad jinghiar pynjot dusmon ia ki ingsah bad ia ki jingdon jingem bad ki dei ban kem ruh mardor ia kiba kiba donkti bad ban pynshitom ia ki katkum ka aiñ,” u la ong.
Kine ki saw tylli ki longing kiba dang im hapdeng ka jingshongsyier, ki la hap ban iasah lang ha ka ing jong u Bah Thna Lawai.
Na ka liang ka Kong Agnes Kharshiing bad Poonam Yadav ki la pynrem jur ia kane ka jingjia bad kynthoh ba kane ka jingleh dusmon ka long tang ka jingleh riewkhlaw kaba pynkhein ia ka hok longbriew manbriew khlem da burom shuh wat ia ka rai jong ka Ingbishar badonburom.(SP News)
