Shillong, Nohprah 20: Ka Khasi Students’ Union (KSU) ka la ioh ban iashong ia ka Central Executive Council (CEC) mynta ka sngi ha kaba la ia kren shibun tylli ki mat jong ka seng.
Ha kane ka jingiashong pyrkhat kam mynta ka sngi kila ia kren ia ka, Comprehensive Mechanism to Tackle Influx, ka Meghalaya Residents Safety bad Security Act 2016, ka Meghalaya Benami Transaction Prohibition (Amendment) Act 2016 bad ka Facilitation Centre ki jaka rung bad ki jaka (Entry & Exit Point) 2016.
Halor kitei ki phang, ka seng ka kyntu ia ka sorkar ban pyntreikam noh kham kloi ia kitei ki ar tylli ki ain haneng da kaba thung noh ia ki District Task Force. Ha kaba iadei bad ki Entry & Exit Points la kyntu ban pynkloi ha kaba iadei bad ka Social Impact Assessment (SIA) ban pynkloi khamtam ha ka Ri Bhoi district kaba dang sah.
Haba ia dei bad ka kam Uranium bad ka jingpyrshah jong ka seng ia ka surok 2 lane na Nongstoin sha Mawthabah, ka seng ka la rai ban leit ia kynduh biang ia u Chief Executive Member jong ka KHADC ban pan jingpynshai ha kaba iadei bad ka song 20 klur ba ka Council ka kular ban ai ban pynbha ia ka surok 1 lane ha kane ka thain.
Haba ia dei bad ka Lynti rel, ka seng haduh kane ka khyllipmat kaba mynta ka ieng beit ban pyrshah ia ka railway project jong ka Tetelia – Byrnihat bad Byrnihat – Shillong tad haduh ynda la ioh ki ain kiba khlain bor ban pyrkhing ia ka jingrung kyrthep ki mynder bad ban iada ia ki trai ri trai muluk ka Jylla.
Haba ia dei bad u NPR lane Aadhaar, ka seng ka ong ba ka sorkar ha shwa ban pyntreikam ia kane ka skim ka dei ban pynlong shwa da ki jingpynshai paidbah ha ki shnong ki thaw kum ki awareness programs ban batai sani ha ka jingiadei bad ka jingthmu jong ka NPR (Aadhaar).
