Shillong, Naitung 16: U bah Sanbor Shullai MLA jong ka 19-South Shillong mynta ka sngi la iathuh ba ka iing dorbar thawain ka jylla kala pynlait pisa mar T.10 lak tyngka ia ki MLA ba kin lah ban iarap ia ki paidbah hapoh ka konstitwensi ha ka por ba ki shem jynjar na ka bynta u snem 2024.
Haba kren ha ki lat pathai khubor mynta ka sngi la ong ba na ka bynta jong mynta u snem 2024 ka pisa la dep ban ai sha ki MLA, lada don ki MLA ki bym kwah ban shim ki hap ban ai da ka jingthoh bad ka daw balei kim treh ban shim ia kaba la mang na ka bynta ka konstitwensi jong ki.
U bah Sanbor la ong ba lada don ki MLA kiba ong ba kin don pisa ban iarap ia ki paidbah ha ka jingshitom kata kala bakla kane ka pisa T.10 lak tyngka kam dei na ka bynta u MLA ka dei na ka bynta jong ki paidbah ban iarap ha ka por ba ki don kam kyrkieh.
La iathuh ba ha kane ka dorbar mang tyngka kaba la long ha u bnai Rymphang la ia kren bad u Lamphang ka iing dorbar u Thomas A Sangma, u myntri rangbah ka jylla ban kyntiew noh ia kane ka DG sha ka T.20 lak tyngka bad kane ka phail kala don ha miej u myntri rangbah ban soi.
La ong ba mynta u snem 2024 kin nym ioh shuh T.20 lak tyngka, kane kin sa ioh ha u snem T.2025, la ong ba ha u snem 2008 ba jop MLA ka DG ka dei tang T.3 lak tyngka ha dien la pynkiew sha ka T.5 lak tynngka bad mynta sha ka T.10 lak tyngka bad ha u snem ban wan kan long T.20 lak tyngka.
