Shillong, Nailur 05: Ki nongialam shnong jong ka Labang Nongphyllut Pangam ka Raliang Area Committee (LNPRAC) mynta ka sngi ka 5 tarik u Nailur 2024 ki la ioh ban wan ban ia kynduh ia u Myntri Rangbah ka Jylla U Conrad Sangma ban ia kren halor ki jingeh ba ki ia kynduh ki shnong ki ba ha kine ki thain ki ba kum ki paidbah ki ia tip kum ka Block 1.
Ha ka ne ka jingiakynduh na ka liang kine ki nongialm ki la ioh ban aiti ia ka dorkhas jong ki ha ryngkat ki kot ki sla kiban pynshisha ba kane ka Labang Nongpyllut ka dang hap hapoh ka Meghalaya.
Ha ka jingiakren bad ki nongthoh khubor ha dien ba ki la dep ban ia kynduh ia u Myntri Rangabha na ka liang u paiem Laborius Manik Syiem u la buh ka jingkyrpat ia u Myntri Rangbah ban ia kren bad ka Sorkar Assam ban pynioh biang ia ka Labang Nongthyllud sha ka Jylla Meghalaya.
U la ongruh ba kum ki nongshong shnong jong ka Labang Nongpyllut ki sngew khmen bad sngew sarong ba ki dei ki hynniewtrep hynniewskum.
U Paiem u la ong ruh ba narmar ka jingbym lah ban pdiang ki khun ki hajar jong ka Labang Nongthyllud ia ka ba la dkhat jubor ka Assam ban pynhap sha ka, ka jingiakhun bad ka jingiakhih jong ki khun ki hajar mynta ka la kynjoh sha ka 73 snem namar ka jingkwah ban pynhap pat sha ka Jylla Meghalaya.
Kum ban shu kdew ba ha ka snem 1941 ka Assam ka la dkaht jubor ia ka Hima Labang Nongthyllud bad ha kane ka jingiakhih ki la don ki ba la duh noh ia ka mynsiem ka ba kordor bad don ruh ki bai ap khrew ha dien ba ki la lait na phatok.
U paiem u la ong ba ha kane ka dorkhas ki la pynpaw ba ka Sorkar Jylla ka la dei ban ia kren bad ka Sorkar India ba kan don ka Tripartite Committee ka ban kynthup ia ka Sorkar India, ka Sorkar Meghalaya bad ka Sorkar Assam khang ba kin lah ban peit ia ki kam pynroi ha kine ki jaka.
Katei ka thian haduh mynta kine ki jaka kim don ia ki surok ki ba biang, ki skul, ki ladjingsumar, bad khamtam ia ki bor ai jingiada. U la ong ruh ba kane ka committee kan iakren ruh ba kam dei ban don kano kano ka jingkhang ia ki Scheme pynroi ki ba wan na ka Jylla Meghalaya ne ka Jylla Assam.
