Shillong, Iaiong 22: Mynta ka sngi ka seng samla pule ka Jaintia Student Union (JSU) kala leit ban ujor sha Deputy Commissioner jong ka West Jiantia Hills District halor ka jingduna kilo khaw ration ba poi sha shnong Mynsngat.
Kane ka jingduna thew kilo kala pynlong ia ki nongioh khaw ban ioh duna na kaba la mang na ka bynta jong kito kiba don ia ka krad ration, kane ka buh ia ka jingartatien ha kaba pyniaid ia ka rukom saw khaw ration.
Ka jingduna thew kilo khaw ration kala buh ia kiba duk ha ka jingeh, ia kane la juhujor sha ki nongsam khaw ration ba don hakatei ka shnong hynrei kam shym don kano kano ka jingpynbeit ia ka jingduna wat la bun bun sien la ujor.
Na ka liang jong ka JSU ka dawa na u DC ban phah tohkit halor kane ka jingduna thew kilo khaw ration ban pynthikna ba kito kiba ioh khaw ration kin ioh beit ia ka bhah ka jong ki kumba ki dei ban ioh.
Ka JSU ka ong ba dei ban leh ei ei halor kane bad na ka liang ka seng kan iai pyrto lada na ka liang jong ka phis ka dei ban leh ei ei ia kane khnang ba kito kiba dei ban ioh ia u khaw ration kin ioh kumba dei ban ioh, ia ka shithi la soi da u samla Jersom Shylla bad u Neilkee Mukhim dkhot ka seng JSU.
