Shillong, Naitung 31: Ka United Democratic Party (UDP) kala pynrem jur ia ka jingshah kem jong ar ngut ki sister ka Balang Catholic na Chhattisgarh bad kila buh ban don ka jingtohkit ba khlem shah liang ha kaba iadei bad kane ka bynta.
U working president ka UDP u Bah Titosstarwell Chyne u la dawa ba dei ban pyllait noh mardor ia kine ki ar ngut ki sister ba kynthup ia ka sister Vandana Francis bad ka Sister Preeti Mary bad la kyrpad ba ia ka ejahar ba la ujor pyrshah ia ki dei ban weng noh.
U la kynthoh ia katei ka jingshah kem, da kaba khot ba ka dei ka jingpynkhein ia ka hok bad ka jingshngain jong ki jaidbynriew rit paid.
“Ka sorkar Chhattisgarh kadei ban shim khia ban pynneh pynsah ia ki jinglong kordor jong ka riti synshar bad ban iada ia ki hok jong ki rit paid.Ngi kyrpad ia ki bor ba dei khmih ba kin shim ia ka sienjam ban iada ia ka ri bad kumjuh ruh ia ki paidbah kiba dei na kiwei pat ki niam bad ban pyntikna ioh ia ka hok,” ong u working president ka UDP.
Shuh shuh na ka liang u Bah Chyne u la pynrem jur ia ka jingkynnoh ba khaii briew bad pynbor ban pynkylla niam kum ki bym don nongrim kidei ki bym don nongrim bad da kaba khot ruh ia kane kum ka jingpyndon kam bakla ia ka ain da ka jingthmu ban pynshitom bein ia ki rit paid.
U Bah Titos u la kynnoh ruh ba kane ka jingshah kem ka paw ba ki thmu ban wanrah ka jingia sngewpher niam bad kane kan buh jingma ha kaba iadei bad ka nongrim bad kumjuh ruh ia ka hok jong ka jingialong kajuh.
“Kane ka jingjia ka pyni ia ka jinglong ka ban pynkulmar jingmut ia ka jingkiew ka jingshun ia ki jaitbynriew rit paid, bad khamtam ia ki Khristan, ha ki bynta bapher bapher jong ka ri,” la kdew u nongialam ka UDP.
U Bah Chyne u la pynpaw ba kane ka jingshah kem kadei ka jingpynkhein ia ka constitutional right to freedom of religion bad u la pynpaw ruh ia ka jingia don bynta lang bad ka Catholic Bishops’ Conference of India (CBCI) bad kiwei de ki kynhun kiba sngewkhia ha kaba iadei bad kane ka bynta.
