Shillong, Nailar 25: u Myntri Rangbah ka jylla u Conrad K. Sangma haba jubab ia ka jingkylli bala wanrah da u Dr. Mizanur Kazi u la iathuh ba haduh mynta ki don 666 tylli ki Anganwadi kiba ka sorkar ka shongwai.
U Myntri Rangbah u la iathuh ba ka jingshna ia ki Anganwadi Centre ha ki block bapher bapher da ka jingiatrei lang bad ka Meghalaya Early Childhood Development Mission bad na ka liang ka sorkar kala shim ia ka rai ba yn sam noh ia ka jingbam sha ki khynnah hapoh 6 snem kan long noh 25 sngi ha ka shi bnai.
Ha kine ki jaka sam bam dei ban sam ia ki jingbam kiba la dep shet bad ai sha ki khynnah kiba 3 snem haduh 6 snem, ki don ruh ki jait jingbam bala shu ai ban rah sha iing na ka bynta ki khyllung ba dang 6 bnai haduh 3 snem bad kumjuh ruh na ka bynta ki longkmie kiba armet bad kane ka long ar sien shi taiew.
Haba jubab ia ka jingkylli bynrap ba ha ka jylla baroh kawei ki don 6,188 tylii ki Anganwadi Centre na kine 5,522 tylli ki don ia ki jaka bala shna ban shet bad ban sam ia ki jingbam hynrei 666 tylli dei kiba shu shongwai, ki Anganwadi kiba don ia ki jaka leit bar ki don 561 tylli bad ka sorkar mynta kiba ka shna thymmai bad kiba pynbha ki don 2,148 tylli bad na kine 1,070 tylli ki dei kiba la dep ka jingmang pisa ka long T.83 Klur/- bad haduh mynta la pynlut T.64 Klur/-.
