Shillong, Kyllalyngkot 15: Ban teh lakam ia ki kam sniew ha kane ka nongbah Shillong nalor ki 200 tam ki CCTV kiba la dep ban pyndait ha kylleng jong kane ka nongbah Shillong, ka sorkar kan sa pyndait shuh sa 200 tylli ki CCTV ha ki bynta bapher bapher jong kane ka nongbah Shillong.
U myntri rangbah ka jylla u Conrad K Sangma haba ia kren bad ki lat pathai khubor mynta ka sngi ka 15 Tarik Kyllalyngkot 2026 la iathuh ba kin sa buh shuh sa 200 tylli ki CCTV ha kane ka nongbah bad ia kane ka juh yn buh ruh ha ka sor Jowai bad Tura.
Na ka liang jong u myntri rangbah ka jylla u la ban jur ba ka phang kaba u kwah ban leh mynta u snem ka long ban wanrah ia ka jingkhuid jing suba ha baroh ki shnong ki thaw ha kane ka jylla Meghalaya.
La ong ba ka National Games kan sa long ha u snem 2027 kumta u kwah ban iohi ba ka jingkhuid jing suba ka jylla ha kaba ki briew kin wan sha ka jylla ki iohi ia ka jingkhuid ha ki shnong ki thaw, khamtam ha kane ka nongbah Shillong, ka sor Jowai bad Tura bad baroh ki nongbah jong ki District.
Ka jingbuh ia ki CTV ka long da ka jingiamir jingmut lang bad ki rangbah shnong, kane ka long ban wan rah ia ka jingshong shngian ha ki dong ki shnong ban ia khun pyrshah ia ki kam khaii drok.
