Shillong, Kyllalyngkot 20: Ki ar ngut ki MLA jong ka seng UDP u Bah Titus Khyne bad u Dr Jemino Mawthoh kila don ha Delhi mynta ka sngi bad kila dep ioh ia ka jingbit ban ia kynduh ia u president u Pranap Mukhejee la shai ka sngi ban ai ia ka dorkhas ha ka ba ia dei halor ka jingkynnoh ba don kti u myntri rangbah ka jylla u Dr Mukul Sangma bad ki lehnoh ANVC(B).
Kane ka kynhun kan leit ia kynduh ia u president jong ka Ri, kyntup ia ki nongialam jong baroh ar tylli ki dorbar bah jong ka Ri hapoh ka lam ka North East Regional Political Parties ha kaba u myntri rangbah ka jylla Nagaland u Neiphiu Rio u long u chairman.
Haba kren ha u SP News Agency u Bah Allantree nongialam jong ka UDP u la ong ba ki MLA jong ka seng ki la don ha ka nongbah Delhi bad ki la ioh ia ka jingbit ba lashai ka sngi kin leit ban ia kynduh ia u president bad ia ki nongialam jong ki ar tylli ki iing dorbar jong ka Ri India ban ai ia ka Dorkhas.
Ia kane ka kynhun yn ialam da u myntri rangbah ka jylla Nagaland u Neiphiu Rio, kane ka jingleit ai ia kane ka dorkhas ka long ban pyntip sha ka sorkar pdeng ba ka la don ka jingkynnoh ba u myntri rangbah ka jylla u Dr Mukul Sangma u don a jingiadei bad ki lehnoh ha kane ka jylla Meghalaya, kumba la kam da ki nongialam jong ka seng ANVC(B).(SP News)
