Shillong, Iaiong 22: ka Meghalaya Roll Ball Association, ka pyntip ba kan pynlong ia ka 2nd Senior East Zone National Roll Ball Championship ha madan ialehkai basketball jong ka J.N Stadium, Polo, kaban long ha ka 24 bad ka 25 tarik mynta u bnai Iaiong.
Ia kane la wan ban pyntip ia ka da u bah Suklang Dkhar ba dei u working President, ryngkat ka jingiadon lang ka jong u bah Joshua Sohtun vice President bad u Freddy Marboh ba long dkhot jong ka Meghalaya Roll ball Association.
Ha kane ka lympung yn don kumba 7 tylli ki jylla kiban wan ban iashim bynta bad kine ki long kum ka Assam, Arunachal Pradesh, Jharkhand, Chattisgarh, Odisha, West Bengbal bad ka Meghalaya, ha kaba kan eka jingiakob kan longn naka bynta ki khynnah kynthei bad shynrang.
Ia kane ka jingialehkai la sdang nyngkong ia ka ha Pune nha u snem 2003 bad hangne hapoh ka jylla Meghalaya la sdang nyngkong ia ka ha u 2019 bad hadien kane ka la lap ba wan noh ka jingkhangdam ne ka locked down, hynrei ka synjuk ka la sdang pat noh ban pyntyllun shakhmat ia kane ka jingialehkai naduh u snem 2022.
Haba phai sha ka rukom ialehkai ki samla ka jylla, u bah Suklang u kam ba ki samla ki la kiew ha kane ka jingialehkai, ha kaba kum ka synjuk ka la lah wat ba kan pynlong ia ka lympung jong ka 4th Federation Cup, kaba hangne lap bad shem ba ki khun samla ka jylla, ki la sdang ban shim khia bha ia kane ka jingialehkai.
Nalor katta u bah Suklang lyngba ka jingwan ban pynlong ia kane ka lympung ialehkai, u kwah bad thrang ba ka Roll Ball kan long kum kawei na ki jinglehkai ba kan don lang ha ka lymnpung bah ialehkai ka ri ka National Games kaba la buh ban long ha kane ka jylla, namar u kam ba kum ka jylla, ka don ia ki nongialehkai kiba tbit ne ba ki lah wan ban ioh ban khur takma naka bynta ka jylla ha ka National Games.
