Shillong, Iaiong 22: Mynta ka sngi ka 22/Iaiong/2026 ka KSU ka shnat Umsning kala kren shai ba ka pyrshah ia ka jingbret blei jong ki Bar Jylla kiba shong ba sah haki thain Zero Point ha ka Pung Nongmahir na ka liang ka seng kan nym shah da lei lei ruh ban dang bteng ia ka jingbret blei ha katei ka pung.
Haba kren sha ki lad pathai khubor u President ka KSU Umsning Circle u Samla Lester Nongbet u la ong ba kum ka seng ka pynpaw ia ka jingpyrshah bad kan nym ai lad da lei lei ruh ia ka puja Committee jong Zero Point bad ia ki shnong kiba marjan ba kin dang bteng ia ka jingbret blei ha ka por ba don ka lehñiam Puja ha ka Pung Nongmahir.
Ka pung Nongmahir kaba dei kawei na ki jaka kaba khring bha ia ki paidbah jngohkai pyrthei ba kin leit shangkai ha katei ka Nongmahir Island kumta na ka liang ka Seng mynta ka sngi kala leit ban ia kynduh ia kitei ki nongialam shnong kiba don ha katei ka thain ba kin nym ai jingbit sha ki puja committee ba kin dang bteng ia ka jingbret blei ha katei ka pung.
Na ka liang jong u nongialam ka KSU u la ong ba ka NGT ka la khang pyrshah ban bret Blei ha ki jaka balong pung bad ki dei ban tih da ka pung kaba tang shiteng por ha ka por ba ki bret Blei.
La pynkynmaw ba ha u snem 2021 na ka liang ka Seng kala khang pyrshah ia ka Umsning Puja Committee ba kin bret Blei ha ka Wah Umran bad na ka liang ka Puja Committee jong ka Umsning ruh kala sngap ia ka jingdawa jong ka Seng bad ka Puja Committee jong ka Zero Point bad ki shnong kiba marjan ba ha u snem 2025 kan dei ka sien kaba khatduh ia ki ba kin ioh ban bret ia ki blei ha pung Nongmahir.
