Shillong, Iaiong 29: ka North Eastern Hill University kala pyntrei kam ia ka National Education Policy 2020 ha ki kollej kiba pyniasoh bad kane ka skul bah jong ka sorkar pdeng ha u snem 2023, hynrei haduh mynta kam pat lah ban pynbiang ia ki jingdonkam katkum ki kyndon NEP.
Ka long ka sien kaba nyngkong ba naduh ba la pyntrei kam ia ka NEP 2020 ki samla pule mynta kila poi ha ka semester 6 ha kaba kin sa thoh ia ka eksam jong ki ha u bnai jylliew bad tang ha utei u juh u bnai kila hap ban leit sha ki semester kaba 7 hynrei haduh mynta ym pat lah ban pynbeit ia ki lynnong ban sa hikai ha ki semester kaba 7 bad kaba 8.
Na ka liang jong ki kmie ki kpa bad kumjuh ki samla pule kiba don bynta ha ka semester kaba 6 ki don hapdeng ka jingdukha ha kaba ia dei bad ka jingpule la kin bteng ia ka semester kaba 7 ne kin sangeh noh tang ha ka semester kaba 6, kane ka jinglynga ka dei tang namar ba ka NEHU haduh mynta kam pat khot ia ka Academic Council ban shim ia ka rai haba iadei bad ki lynnong ba ki samla pule kin pule ha ka semester kaba 7.
Halor kine ki jingbymshai la ka dei na ki kollej ne ki samla pule, ne ki kmie ki kpa haba ia dei bad kane u SP News Agency u la ioh ban ia kren bad u professor Lakhon Kma u wei na ki nonghikai ka NEHU haba ia dei bad ki lynnong pule ha ki shnat pule pabher bapher kiba don ha kane ka skul bah u la ong ba la jan baroh ki shnat pule kila dep pynkhreh ia ki lynnong pule.
U professor Kma u la ong wat la ki shnat pule kila dep ban pynkhreh hynrei ban pdiang ka bor ka shong ha ka Academic Council kumta la donkam ba u symbud vice chancellor un khot noh ia ka Academic Council namar ka statue ka ai bor haba ym don u vice chancellor u lah ban shim ia kano kano ka rai haba ia dei bad ka pule puthi lait noh ka thung kam tymmai.
