Shillong, Iaiong 29: Hadien ka jingbyrngem lyngba ki lad pathai khubor, jong ka Joint Action Committee, kaba kynthup ia ka East Jaintia Hills Truck Owner and Transporter Association bad ka Jaintia Hills Truck Owners’ Association, ba kan nang pynjur shuh shuh nangne shakhmat ia ka jingiakhih.
Ka jingbym patiaw jong ka Star Cement bad ka Dalmia Cement halor ki mat jingdawa jong ka, bad ruh halor ka mat dawa ban pynduh pyndam noh shisyndon ia ka jingpyndonkam jong ki kharkhana dewbilat jong ka East Jaintia Hills ia ki bulker trok.
U Deputy Commissioner jong ka East Jaintia Hills District, mynhynnin ka sngi (27.04.2026), u la khot kyrkieh ia ka JAC bad ia ki nongmihkhmat jong kitei ki kharkhana cement sha ka meij jong ka jingiakren, ha Conference Hall jong ka Office jong u.
Ha katei ka jingialang, kaba la pyniaid hi da u Deputy Commissioner jong ka district, u Manish Kumar, IAS, ha ryngkat ka jingiadonlang u Superintendent of Police, ka district, u Vivekanand Singh, IPS, bad ia kaba la wan iashim byntalang, da ki nongmihkhmat jong ka Star Cement bad ka Dalmia Cement, lem bad ki nongialam bad ki dkhot jong ka JAC.
Ka Star Cement, ka la la hap ban pyndem noh hakhmat ka JAC, da kaba ka la kohnguh bad kular ban ai trip (loading) noh ia ki trok jong ka JAC, kat kum ba ki la dawa, kata, 9 trip ha ka shisngi.
Ia katei ka 9 trip, 7 trip, da dei ka cement lane clinker, kan dei sha ki thaiñ Khadlai Mer bad Sonapur, bad sa 2 trip pat, tang da ka cement suda, sha ki thaiñ Silchar. Ha kajuh ka por, ka Star Cement, ka la kular ruh ba kan pynthikna bha ba, kan ym don shuh kano kano ka jingpynap slem ia ki trok jong ka JAC, da dei ha ka jaka thep ne ha ki jaka pynhap mar.
Katba, ha ka jingiadei bad ka Dalmia Cement, ki nongmihkhmat jong ka, ha katei ka jingialang, kim pat shym la lah ban ai ia kano kano ka rai jong ki halor ki mat jingdawa jong ka JAC kaba iadei bad ka Dalmia cement.
Ha ka jingiadei bad ka Star Cement, namar ba ka la kular ban pynioh bad pyndep ia ki mat jingdawa jong ka JAC, kumta ha ka General Meeting jong ka JAC, kaba la khot pynlong kyrkieh mynta ka sngi, ka la shim ia ka rai ba, ia ki trok kit cement bad clinker jong ka baroh, yn ym bat shuh naduh mynta ka sngi, ha kane ka jingiakhih jong ka JAC.
Katba, ha ka jingiadei pat bad ka Dalmia Cement, namar ba kam pat lah ban ai ia ka rai halor ki mat jingdawa jong ka JAC, kumta, ha katei ka juh ka jingialang jong ka JAC, ka la rai ba, ia baroh ki trok kit cement bad clinker jong ka Dalmia cement yn dang iai bat bad pynphai beit noh ia ki sha ka jaka kaba ki la wan, ha kane ka jingiakhih jong ka JAC.
Lada jia ba ka Dalmia Cement kam sngap ne patiaw ia ki mat jingdawa jong ka JAC, ka JAC, kan nangpynjur shuh shuh nange shakhmat ia ka jingiakhih jong ka pyrshah ia ka Dalmia Cement.
Ha ka jingiadei bad ki bulker trok kiba la pyndonkam da ki kharkhana dewbilat kiba don ha East Jaintia Hills, ka jingpeitngor, jingbat bad jingpynphai kylla ia ki kan dang iai bteng kum ba ju long man la ka sngi hi, ha kane ka jingiakhih jong ka JAC.
Ha ha katei ka juh ka jingialang jong ka JAC, ka la shim ruh ia ka rai ba, kan shim da kiwei pat ki sien jam kiba kham khor lada jia ym pynduh pyndam noh ia kitei ki bulker trok, kane ka long katkum ka kyrwoh kaba la phah da u bah Kyrshan Dkhar Secretary ka Joint Action Committee.
