Shillong, Jylliew 01: Ha ka 31 tarik Jymmang 2026, arngut ki samla kynthei na Barato, Meghalaya, ki la pyntip sha ka Khasi Students Union (KSU) Delhi Unit ban pan jingïarap kyrkieh. Katkum ka jingïathuh jong ki, la wanrah ïa ki sha Delhi da kaba kular ba yn pynïoh kam ïa ki ha kawei ka hotel. Hynrei, hadien ba ki la poi sha Delhi, la kynnoh ba la pynbor ïa ki ban rung ha ki kam khaïi met.
Katkum ka jingïathuh jong kine ki samla kynthei, haba kila kyntait ban leh kumta, ka kynthei kaba wanrah ïa ki sha Delhi ka la dawa ba kin siew biang ïa ka pisa leit jingleit ba la pynlut na ka bynta jong ki bad ka la knieh ruh ïa ki mobile phone jong ki. Ki la kynnoh ruh ba ym shah ïa ki ban mih na katei ka jaka tad haduh ba kin siew biang ïa ka pisa ba la pynlut ha ka jingleit jong ki.
Hadien ba ka KSU Delhi Unit ka la ïoh pdiang ïa kane ka jingïakyrpad jingïarap, mar mar ka la pyntip sha ki Pulit Delhi bad ka la pan jingïarap na ki. Ki Pulit Delhi ki la shim khia ïa kane ka kam bad ki la lap bad bat ïa katei ka kynthei na ka bynta ka jingtohkit.
Haba la tohkit ïa ka, ka la kyntait ïa baroh ki jingshah kynnoh ba la mudui pyrshah ïa ka. Ka la ong ba kine ki arngut ki samla kynthei kila wan hi da ka mon sngewbha lajong sha Delhi ban wad kam, bad ba kala siew ïa ka bai leit bai wan jong ki ban jingïarap ïa ki ban ïoh kam. Ka la kyntait ruh ba ka don bynta ha kano kano ka jingpynbor lane jingthmu ban pynrung ïa ki ha ka kam khaïi met.
Hadien ka jingïalam jong ki Pulit Delhi, la bthah ïa katei ka kynthei ba kan pynphai noh ïa ki mobile phone jong kitei ki arngut. Hadien kata, la aiti noh ïa ki samla kynthei sha ka jingïada bad jingïarap jong ka KSU Delhi Unit.
Ha kane ka por, kine ki arngut ki dang don hapoh ka jingïada bad jingïarap jong ka KSU Delhi Unit. La pynbeit ruh ïa ki lad jingïarap ban pynpoi suk ïa ki sha la ïing. Kiba ha ïing hasem jong kawei na ki kila phah ïa ka pisa ban siew ïa ka tiket liengsuiñ jong ka, bad ka la buh jingthmu ban leit phai noh sha Meghalaya lashai ka sngi.
Ka KSU Delhi Unit ka dang ïai bteng ban peit bad jingïada ïa ka bha ka miat jong ki samla bad ki nongshong shnong na Meghalaya kiba don ne leit sah shabar ka jylla.
Ka seng ka kyntu ïa baroh kiba wad kam ba kin long kiba husiar bha haba pdiang ïa kino kino ki jingkular kam na ki briew bym lah ban shaniah bad ba kin pynshisha bha ïa ka jingshisha jong kine ki jingkular shuwa ban leit sha kiwei pat ki jaka.
