Shillong, June 01: Katkum ka phangma jong ka National Education Policy (NEP) 2020 bad ka ba duriap ban pynkhlaiñ ia ka rukom thewdor lyngba ki kor ka juk mynta, ka Meghalaya Board of School Education (MBOSE)ka la pynlong ia ka shlem hikai ba saw sngi halor ka phang “PARAKH Taxonomy, Holistic Progress Card (HPC) and Development of Question bad Item Banks for the Integrated Test Management System (ITMS)”.
Kane ka dei kaba dei ban pynkhreh ia ki jingkylli kum ki atiar ban thewdor ia ka jabieng baproh ki khynnah skul lyngba ki kor ki ba jurip sani ia ka bor pyrkhat ki khynnah skul ha ki jingpule. Kane ka shlem hikai kan sdang naduh shitarik Jylliew haduh sawtarik Jylliew, 2026 ha ka shlem treikam jong ka shnat MBOSE ha nongbah Shillong.
Ka shlem hikai ka thmu ban ai jinghikai ia ki nonghikai bad ki riewtbit ha la ki kam ki ba dei ia ki phang hikai ki ba dei ban long salonsar ha baroh ki shlem korbar skul shityllup ka Ri India, ba la lam lynti da ka PARAKH, NCERT, New Delhi. Baroh lang kumba phraphew ngut ki nonghikai na byllai ki skul ha jylla baroh kawei ki la ia shim bynta ha kanre ka shlem hikai.
Ka PARAKH ka dei ka atiar jong ka NCERT na ka bynta ban thewdor ia ka jingtip jong ki khynnah skul da ki lad ki ban tei ia ka jabieng baproh khnang ban biang ka jingpule bad jingtrei ka ban ryngkat salonsar ha Ri India.
Ka PARAKH ka kyntiew ia ka jingpule da ka jingtbit ka ba shemphang, ym da ka ba shu kynmaw lyndet ia ka jingpule bad ka thew shai ha ki tyllong baskhem jong ka tipkyllum, ka ktah shlipnud bad ka thawlade.
Ia kane ka shlem hikai la pyniaid da ka Dr. Esther J. E. Shongwan, Chief Academic Officer and PARAKH Cell Coordinator, MBOSE bad la ai jinghikai da ki riewtbit ba kynthup ia u Mr. Vinod Prasad Semalti, Secretary, Uttarakhand Board of School Education, bad Mr. Shailendra Joshi, Academic Officer and PARAKH Cell Coordinator.
Ha ka jingkren ban shim khia ia kane ka shlem hikai, ka Dr Esther J E Shongwan Chief Academic Officer, MBoSE ka la pynshai jingmut ba ka rukom ba ju long ban kynmaw lyndet ia ki jingpule ha ki khep ba la dep ka ba tynjuh tang ia ka jingkynmaw.
Ka shruh sam jingtip jong ka PARAKH ka synrop lang bad kata ka rukom thewdor ka ban sam jingstad bad jingtip da kata ka jabieng baproh ka ba lah ban pyrkhat da ka ba tohkit, da ka jingtbit ha la ka kam, ka ba lah ban thaw na lade bad ka ba tei da ka mynsiem shitrhem ha ryngkat ka ba khajoh sha ka jingjop ha ka jingstad pule kot.
Ka bynta ba kongsan jong ka shlem hikai ka dei da ka ba pynithuh ia ka rukom tynjuh ba tip kum ka Integrated Test Management System (ITMS), ka ba dei ha ka rynsan shongdor da ki kor ka juk mynta ba la tei bad pynsan da ka NCERT na ka bynta ban kyrshan ia ka thewdor ka ba kheiñ ia ka jingtbit kyllum kumba la buh jingkheiñ. Ka ITMS ka pynlong ia ki nonghikai ban shna jingkylli na ka thiar ka ba la lum thup bad iasnoh bad ka PARAKH.
Manla ki jingkylli ha kata ka jylli marryngkat la pynbiang ia ka jingtbit ka ba dei hapoh ka kyrdan jong ka tipkyllum, ka ktah shlipnud bad ka thawlade, ban pynthikna ba ka jingthew dor kan kyntiew ia ka jingtip ba thikna ban ia ka ba iai pyrthuh bud na ka ba shu kynmaw ha jabieng.
Ka rynsan ka khmihlynti ruh ban noh synñiang sha ka ba thew ryngkat dor ha baroh ki shlem korbar skul, na jylla bad na ka sorkar kmie, khnang ban ia ryngkat dor salonsar ha baroh ka rukom hikai ha Ri India.
Lyngba kane ka shlem hikai ka MBOSE ka khmih ba ki nonghikai ki ba biang ka jingtip bad ka jingtbit ha ka kam ba kin pyntreikam ia kane ka rukom thewdor bad ban kyrshan ia ka jingtbit sani ban shah hikai katkum ka phangma jong ka NEP 2020.
