Shillong, Naitung 11: Mynta ka sngi la pyni paidbah iaki lai tylli ki kop jong ka Durand Cup ha State Convention Centre shwa ban sdang kane ka jingialehkai kynjat bol kaba la rim tam ha Asia bad mynta kala kynjoh sha ka 135 snem naduh ba la sdang iaka, bad kane ka dei ka sien kaba lai ba la pynialehkai ha ka nongbah Shillong.
Haba kren ha kane ka jingialang ban pdiang burom iaki lai tylli ki kop u Myntri ialehkai ka jylla u bah Wailadmiki Shylla u la kyntu iaki bor ba pyniaid iaka Durand Cup 2026 ba lada long kaba lah, ba iaka phainal, kin pynlong ha ka nongbah Shillong, ia kane ka jingialehkai la kyrshan da ka sorkar Meghalaya ha ka jingiatreilang bad ka kynhun shipai Assam Rifle.
U Myntri u la ong ba ka jylla kan sa pdiang iaka 39th National Games ha u 2027 bad na ka liang ka sorkar kala shim ia baroh ki lad ki lynti ban pynbha iaki jaka ialehkai bad khamtam eh ha ka jingialehkai kynjat bol namar ka sorkar ka kwah ban pynlong iaka Meghalaya kum ka pdeng ha ka jingialehkai kynjat bol.
Ha kane ka sngi, u Myntri ka tnad ialehkai u la kren ruh iaka jingshim khia ka sorkar ban kyntiew iaki kam ialehkai ha kaba la shna iaka stadium ha Shillong ha Tura, Ampati bad kiwei kiwei ki jaka namar ka jingialehkai kynjat bol ka long ha baroh ki shnong ha ka jylla.
Ha ka jingkren u Lieutenant General, u Mohit Wadhwa, GOC ka Area 101 Shillong, u la ong ba baroh ki kynhun ialehkai ha kane ka Durand Cup 2026 ki don 24 tylli ki kynhun na Meghalaya kiba ioh ban ialehkai ka Shillong Lajong Football Club, ka Langsning Football Club bad ka Nongkseh Sport bad Cultural Club.
Ki jingialehkai ha Meghalaya kin long 8 tylli kan kynthup kawei ka quarter final bad kawei ka Semi final ha kane ka sngi, la don lang ruh kiwei kiwei ki heh shipai, u Air Marshal, u Devendra P Hirani, Senior Air Staff Officer ka Eastern Air Command, Shillong; kong Idashisha Nongrang, IPS, DGP, Meghalaya Police; Major General, u D.K. Singh, SM, VSM, GOC Bengal Sub Area bad Vice Chairman, DCOC; kong Isawanda Laloo, IAS, Secretary, Department of Sports & Youth Affairs kaba kren pdiang burom ha kane ka jingialang.
