Shillong, Nailar 08: Ka National Institute of Fashion Technology (NIFT), Shillong, ka la rakhe ïa ka National Handloom Pakhwada 2026 da ki jingïalang kiba iphuh iphieng naduh ka 3 tarik haduh ka 21 tarik u Nailar 2026, kaba kynmaw burom ïa ki riti dustur thain jain ba riewspah jong ka India katba ki ai mynsiem ïa ki samla ban long ki nongsumar ïa ka pateng ba iadei bad ki jaiñ jong ka ri.
Ka jingrakhe ka pynïasoh lang ïa ki nongthaiñ jain, ki samla pule, ki nonghikai, bad ki riewieid ïa ki kam thain jain ha ka jingpyrshang lang ban pyndon burom ïa ka pateng jong ki kam thaiñ jain jong ka India bad ban pynkhlain ïa ka jingdonkam ban pynneh pynsah ïa ki dustur thaiñ jain bapher bapher jong ka thaiñ Shatei Lammihngi jong ka India.
Da kaba ioh mynsiem na ki rukom pyrkhat jong ka Swadeshi Movement, kaba la kyrshan ïa ka jingtrei kti bad ka jinglah ban kyrshan dalade, kane ka jingrakhe ka pyndon burom ïa ka kam thaiñ jain kum ka dak jong ka jinglong tynrai jong ka India bad ka lawei kaba iaineh.
Kawei na ki bynta ba kongsan jong kane ka jingrakhe ka la long ka jingpyni live ïa ka rukom thaiñ jain, kaba la plie paidbah ha ka 3 tarik u Nailar 2026, ha kaba ki nongthaiñ jaiñ ba tbit ki la pynlong ïa ki jingpyni ia ka rukom thain jain bad ïakren bad ki nongïashim bynta, da kaba ai jingmut shaphang ki rukom thain jain tynrai, ki tiar tynrai, bad ka jingdonkam ha ka kolshor.
Ka jingpyni ka la long kum ka rynsan na ka bynta ka jingïasam jingtip hapdeng ki nongtrei kti bad ki samla pule. Ka la sakhi ïa ka jingïashim bynta shitrhem na ki samla pule jong ka NIFT Shillong ha kylleng ki Tnad, ha ryngkat ki samla pule na ka Tnad Home Science, St. Mary’s College, Shillong.
Haba ai jingkren ha kane ka jingialang, u Dr. Brijesh Deore, Director ka NIFT Shillong u la ong, ‘Ka kam thain jain kadei kawei na ki spah ba khraw jong ka India. Kum ki nongshong shnong kiba don ka jingkitkhlieh, baroh ngi don ka jingkitkhlieh ban pynneh pynsah bad kyntiew ia ki riti dustur tynrai jong ngi kiba iadei bad ki jain.
Ha ka NIFT Shillong, ngi ngeit ba ka jingpule kadei ban pyniasoh ia ki samla pule bad ki nongthain jain khnang ba ka jingstad tynrai kan lah ban ai mynsiem ia ki jingsaindur thymmai ha ka juk mynta. Kadei ka jingpyrshang jong ka NIFT ban pyniasoh bad ki nongthain jain ha ki rynsan bapher bapher, bad ban kyntiew ia ki mar na ka thain sha ka pyrthei.’
Ka Kong Lebaini Rymbai kaba dei ka Nongseng jong ka Eri Weave, Meghalaya ka la ïaroh ïa ka NIFT Shillong kaba la wanrah ïa ka rynsan kaba pynïasohlang ïa ki nongthaiñ jaiñ, ki nongtrei kti, ki riewshemphang, bad ki samla nongsaindur ban rakhe ïa ka pateng jong ka India ha kaba iadei bad ka kam thain jaiñ.
Haba kren shaphang ka jingïaid lynti jong ka ha ka kam seng kam seng jam ban tei ïa ka kam shna silk Ryndia (Eri) kaba iaineh bad ban ïoh ïa ka jingbei tyngka kaba kongsan ha ka Shark Tank India, ka la pynshlur ïa ki samla pule ban peit ïa ki kam shna jingshna tynrai kum ki lad ban saindur thymmai, ka kam seng kam seng jam kaba lah ban iaineh, bad ka jingktah ha ka imlang sahlang.
Ka la ban jur halor ka jingdonkam ban pynneh pynsah ia ki dustur thain jain tynrai katba ka dang wanrah ia ki lad ha kaba iadei bad ki iew kiba katkum ka juk mynta kiba pynkupbor ia ki nongtrei kti bad pynkhlain ia ka kamai kajih ha ki jaka nongkyndong.
Ia kane ka prokram la plir pyrda da ka Kong Regina Sujai, ka nongthain jain kaba la tbit kaba la don palat arphew snem ka jingshemphang ha ka kam thain jain Eri. La pawnam na ka bynta ka jingaiti jong ka ban pynneh pynsah ïa ki riti dustur thain jain tynrai jong ka Meghalaya, ka jingdon jong ka ka la pyni ïa ka jingdonkam ban ithuh ïa ki jingnoh synñiang ba kordor jong ki nongtrei kti kiba tbit ha kaba pynneh pynsah ïa ka kam thain jain ba riewspah jong ka India.
Ka jingrakhe ïa ka National Handloom Pakhwada 2026 kan bteng haduh ka 21 tarik u Nailar 2026, ha kaba kin don ki jingïakob shon dur bad shna reel, ki jingïakob saindur, ki natural dye workshop, ki jingiakop dro dur bad Quiz, bad ki prokram ba iadei bad ka imlang sahlang bad ki lad pathai khubor.
Lyngba kine ki prokram, ka NIFT Shillong ka pynskhem biang ïa ka jingkular jong ka ban pynneh pynsah ïa ka pateng thain jain jong ka India katba ka ai mynsiem ïa ki samla pule ha kylleng ki kam saindur, ka jingïakren, bad ka jingpynïaid ban rakhe, kyntiew, bad saindur thymmai ha ki kam ba iadei bad ki jain. Ka jingrakhe ka pyndon burom ia ki nongthain jain jong ka India, kiba ka jingtrei kti jong ki kaba iaineh ka long ka tynrai jong ka jingsarong ia ka kolshor bad ka jingai mynsiem ban saindur.
