Shillong, Nailar 10: Mynta ka sngi ka party Congress ha Meghalaya kala pynlong ia ka jingiaid paidbah ban pyrshah ia ka “Foreign Contribution Regulation Bill, 2026 na madan Fire Bridge sha Don Bosco square ha kaba bun bah ki briew kila wan ban shim bynta ha kane ka jingiaid paidbah.
Haba kren ha ka jingialang u President ka Meghalaya Pradesh Congress Committee u bah Vincent H Pala ba dei MP ba rim na 1-Shillong Parliamentry (ST) Constituency ba dei ruh u myntri khynnah ka sorkar jong ka Congress u la pynshai paidbah ha kaba ia dei bad kane ka ain Foreign Contribution Regulation Act, ia kaba ka sorkar BJP mynta ka kwah ban pynkylla ia kane ka ain.
U Bah Pala la ong ba, balei kane ka bill ka long kaba sniewtam, ka long lada don kano kano ka iing mane kaba ioh jingiarap na ki bor kiba na bar, na America ne na Germany bad nawei nawei ruh, lane da don ki skul kiba ioh jingiarap ne ki hospital kiba ioh jingiarap, ki seng treimon sngewbha kiba iarap ai kam ai jam ban pynbha ia ki skul ne kino kino ban iarap ia kiba duk ne ki khunswet, ka long uno uno u ba kwah ban ioh jingiarap na bar hap don ka Laisen.
Kane ka laisen ka iarap ia ki briew ha ka Ri India, mynshuwa ki don palat sanphew hajar tylli ki laisen mynshuwa hynrei mynta bad mynta ki don sa tang khatsaw hajar tylli ha dien ba kila shah pynduhnoh, bad na kine khatsaw hajar tylli lano kumno kumno 2313 ki dei na North east India bad na kine ha Meghalaya kiba dang trei kam ki don sa 7o tylli.
U bah Pala u la ong ba blei ki hap ban ia pyrshah, ka long ba lada ki shna ia ka iing mane kaba shiklur, lada ioh ia ka jingiarap kaba tang shiphew lak tyngka na sha bar kin shim noh ia ka iing mane lada ngim lah ban pynbiang ia ki jingdon kam, lane ki skul, ki hospital, kino kino ki jaka ai jinghikai ia kiba duk, da ka jingpynkhreh ka BJP ia kane ka Bill baroh kine ki don ha ka jingma.
Ha kane ka Bill kila pynrung ia kawei ka kyndon, lada ymlah ban pynbiang ia ki kot ki sla, lane ka FCRA laisen ka shah pynduh ka sorkar kan shim noh ia ki jaka puta kiba la ioh pisa lyngba ka FCRA, lane ym lah ban pynthymmai lane sangehnoh, katkum kane ka bill kin buh ia kawei ka bor ban shim noh, bun ki skul mynta ki ioh jingiarap, lada pynsagneh kan kiew ka bai skul, kan kiew kabai hospital.
Kane ka FCRA kam dei tang na ka bynta ka party Congress, hynrei ka dei na ka bynta ka jingmyntoi jong ki paidbah, ka BJP kala ong ba kane ka bill kan long nangne sha khmat, hynrei ka jingdon kam ia ki samla kan dang jur nangne sha khmat dei na kane ka daw ba don kam ia ka jingiarap na Shabar, kane kam dei na ka bynta ka seng Congress, na ka liang ka party ka kren shai lada don kiba pyndon kam bakla ia ka pisa ba wan na ka FCRA pynshitom iaki.
