Shillong, Nailar 12: U Myntri Rangbah, Conrad K Sangma, mynta ka sngi, ula leit iashimbynta ha ka Ascent 2026, ka seminar halor ka jingtei ia ka rukom treikam na ka bynta ka jingjop ha ki comptetitive exam ka UPSC bad kiwei ki competitive exam ka Jylla bad ka Sorkar Pdeng.
Ia CM-Aspire Cheque ruh la sam ha kane ka jingialang kaba la pynlong ha MATI Campus, Mawdiangdiang, Shillong. Kiba iadonlang ki kynthup ia u Directir General, MATI, Bah Cyril Diengdoh bad Director, MATI Swapnil Tembe.
Haba ai jingkren, u Myntri Rangbah, Conrad K Sangma ula ai khublei ia ka MATI halor ka jingpynlong ia kane ka jingialang bad ong “Kane ka dei sienjam kaba don burom bad ba kongsan ban ai lynti sha ka thong jong ngi ban ioh ia ka jingjop ha ki competitive exam ka UPSC bad kiwei kiwei.
Ula bynrap ba ka Jylla kam duna ia kiba don sap hynrei u pyntip ba ka rukom treikam ban sei ia kine ki sap ryngkat lang bad ka jingai ha ki ia ki jingpyni lynti bad jingkyrshan kam shym don satia. Ula kdew ia ka jingjop jong ka STAR program ha ki kam ialehkai kaba ithuh ia ki nongialehkai kiba tbit eh napdeng ki 30,000 ngut ki samla da ka jingthmu ban sei ia ki nongialehkai kiba tip tam kiba lah ban iakop hapoh ka Ri bad ka pyrthei.
Ula sam jingtip ruh ia ka jingpynkylla ia ka jingim jong kine ki nongialehkai bala ithuh lyngba ka pule puthi kaba biang, ka bam tei met bad ka jingai jinghikai pyntbit da kaba thmu ban ioh ia ka Olympic medal hapoh u 2036.
Kumjuh ruh, ula ong ba ka CM-Aspire ka thmu ban kyrshan ia ki samla ba kwah iakhun ia ki eksam UPSC ka ban iarap ia ki ba kin pass ia ki eksamin ha ki kyrdan bapher bapher da kaba pyni lynti, ai jinghikai bad ka jingiarap song pisa.
U Myntri Rangbah ula ban jur ruh ia ka jingkongsan ban buh ia ka thong bad ka kynhun ban pynkylla ia kane ka thong sha ka sienjam ba lah ban pyntreikam bad ba lah ban leh eiei khnang ban ioh ia ka jingjop bad ong “Ngi donkam ban don ia ka thong da ka thong kaba shai ia kaei kaba ngi kwah ban ioh”.
Halor ka kam nongiaam bad ka synshar khadar ha Meghalaya, u Myntri Rangbah ula batai halor ka rukom pyrkhat pyrdain ha lynti ka synshar khadar, haba nujor ia ka sha ka jingialehkai ba khlem kut bad ka thong kiba dang don shakhmat.
Ula kren halor ka bynta jong ki nongialam sain pyrthei ban saindur iaka rukom pyrkhat, ka jingioh jngai bad ka jingpynbeit ryntih bad ki policy haba ban jur halor ka jingdonkam ki beaurocrats bad ki nongtrei ba pyndap ia ka jinglah bad jingtbit jong ki ban pynlong ia ki policy kiba lah ban pyntreikam.
Halor ka jingtei ia ka rukom treikam na ka bynta ka jingjop, u Myntri Rangbah ula kren halor ka jingdonkam ban tei ia ka dustur ban sei ia ki buit thymmai, ki kam ialehkai bad ka sengkam sengjam lajong bad kdew ruh halor ka jingkyrshan ban don ka jingkyrshan na ka bynta ki competitive exam bad kiwei kiwei ki jingangnud. Ula iathuh ruh ia ka thong ban pynlong ia ki samla ka Jylla kiba synniang ha ka jingtei ia ka Ri kynthup ka jinglong ki nongialam hadien habud ha ki kyrdan ba halor jong ka Sorkar.
Haba pynkut, u Myntri Rangbah, ula pan ia ki jingai jingmut bad ki jingpynsngew na ki paidbah ban lah pynajanai ia ka CM-Aspire programme haba kubur ba ym don satia kaei kaei ruh kaba biang nadong hadong bad ka don beit ka jaka ban pynbha ia ki.
U Myntru Rangbah bad ki Heh Ophisar kila sam ruh ia ka CM-Aspire cheque ha kane ka jingialang. Hynniew ngut ki kyrtong kiba la pass ia ka UPSC Civil Services Premilinary Examintation kila ioh ia ka cheque ba mar T.50,000. U Myntri Rangbah ula plie paidbah ruh ia ka Digital Learning Lab jong ka Meghalaya Administrative Training Institute ha kane ka jingialang.
