Shillong, Nailar 25: U Myntri ba dei peit ia ki tnad sam um Marcuise N.Marak haba jubab ia ki jingkylli bala wanrah da u bah Mayralborne Syiem la iathuh ha Ri Bhoi District la test 3,336 sien ia ki um ha u snem 2025-2026 ha kane ka jingtest ym shym lap ba ki um kin jaboh.
Haba iadei bad ka jingslem ban pyndep ia ka Nongpoh Combine water Supply Scheme lyngba ka JJM ka daw ka long ba kala don ka jingpynwit ha ka Joint Action Committee Wah Umran bad ka jingujor na ka tnad khlaw Umsaw Range Forest.
Na ka liang ka tnad sam um kala shim ia bun ki lad ki lynti kumno ban pynneh pynsah ia ki tyllong um da kaba trei ryngkat bad ka tnad pynneh pynsah khyndew da kaba thung dieng, shna ia ki Dam um bad kiwei kiwei ki jingshna ban pynneh pynsah ia ka um.
Haba jubab ia ka jingkylli bynrap la iathuh ba ka jingtrei ia katei ka skhim sam um ha Nongpoh dang dep 75% bad ka sorkar kala buh ia ka thong ban pyndep ha u bnai Nohprah 2026 haba iadei bad ka jingsahteng jong ki bill ia ki jingtrei JJM ka sorkar pdeng kala buh kyndon ban siew shwa ia kito kiba la pyndep 100% bad kiba la lah ban pynpoi um.
Haba iadei bad ka jinglong jingman ki tyllong um ka tnad sam um kala shem ba ki don haduh 785 tylli ki tyllong um kiba don hapdeng ka jingma kaba ki lah ban tyrkhong noh dei halor kane ka sorkar kala shim ia bun ki lad ki lynti kumno ban pynneh ia ki tyllong um.
