Shillong, Nailur 07: Ka Central Agriculture University, Imphal kan pynlong ia ka jingialang kaba heh ha Umiam Ri Bhoi District lai sngi lynter ban iakren halor ka rep tynrai ban kyntiew ia ka ioh ka kot sha ki nongkyndong.
U Prof, Dwipendra Thakuria, u nonghikai ha ka Kolej ban pule ia ka rep ka riang kaba don ha Umiam Ri Bhoi District la ong ba ia ka jingialang yn plie ha ka 9/Nailur/2026 bad kan kut ha ka 11/Nailur/2026, ka mat jingiakren ka long “Natural Farming, Fathways to Self-Reliant Farming and Rural Prosperity”.
Ka jingpynlong ia kane ka jingialang ka long ban iakren ia ka rep tynrai khamtam eh ha kane ka thain shatei lam mihngi jong ka Ri India, ka jingthmu ka long ba ki nongrep ki dei ban kham iohnong na kane ka rep tynrai bad ha kane ka jingialang kin iakren ia ki hynriew tylli ki phang ba iadei bad ka rep tynrai.
Ha kane ka jingialang kaba lai sngi ki don 461 ngut ki ban wan ia shim bynta na ki ar phew wei tylli ki jylla jong ka Ri India, ki don 51 tylli ki jaka pule ha ka rep kin wan ia shim bynta bad 96 ngut ki nongrep kiba la pynneh pynsah ia ka rep tynrai.
Ha kane ka jingialang kin iakren sani ha kaba iadei bad ki polisi kiba iadei bad ka rep tynrai kyrpang ha ka thain shateilam mihngi ka Ri India bad ia ka jingmih na kane ka jingiakren kin sa ai sha ki sorkar jylla ba kin shna ia ki polisi ba iadei bad ka rep tynrai.
