Shillong, Nailur 07: Ha ka sienjam kaba nyngkong, ki kynhun jong ki nongthoh khubor na artylli ki jylla ka thain shatei lammihngi – Meghalaya bad Sikkim – ki la iawan lang ban iashim bynta ha ka joint Press Tour sha Keralam, kaba plié lad ia kine ki nongthoh khubor ban iohi dalade ia ki jaka treikam jong ka Sorkar Pdeng, ki projek ba kyrpang, ki sienjam na ka bynta ka roi ka par bad ki jingjop ha kane ka jylla.
Kane ka Press Tour, ka ban long naduh ka 6 haduh ka 11 tarik u Nailur, 2026, ka la sdang mynta ka sngi haba kine ki nongthoh khubor ki la poi ha Kochi. La pdiang ia kane ka kynhun da ki ophisar jong ka Press Information Bureau (PIB), Kochi, kiba la pdiang burom ia ki bad pynkhreh ia ki kam ki ban wan.
Kane ka sienjam ka thmu ban plié lad ia ka jingpynsaphriang ia ki khubor ha Meghalaya bad Sikkim kiba iadei bad ki sienjam, ki jingjop bad ki kam na ka bynta ka roi ka par ba la shim da ka Sorkar India.
Kane ka kynhun ka kynthup 14 ngut ki dkhot, kynthup ia hynriew ngut ki nongthoh khubor ba la ioh jingithuh da ka Sorkar na Meghalaya, bad hynriew ngut ki nongthoh khubor na Sikkim kiba la ioh jingithuh da ka Sorkar, bad ruh arngut ki ophisar.
Kane ka Press Tour ka long kaba kongsan namar ka wan ialam lang ia ki nongmihkhmat na ka kam pathai khubor na ar tylli ki jylla ka thain shatei lammihngi ha kawei ka sienjam kaba plié lad ia ki ban ioh jingtip shaphang ki sienjam jong ka Sorkar Pdeng na ka bynta ka roi ka par, ki jaka treikam jong ka Sorkar Pdeng, bad ka plié lad ia ki ruh ban don ka jingiakren hapdeng ki nongthoh khubor na kane ka thain.
Kum shi bynta jong kane ka sienjam, ka kynhun kan leit jngoh ïa ki jaka treikam bad ki projek kiba kongsan kiba ïadei bad ki kad lieng, ki kam pyniaid lieng, ki lad ka leit ka wan lyngba ki jaka shong um, ka kam ïada ri, ka kam ri dohkha ha duriaw, ka jingshna lieng, ka jingkyntiew ia ki karkhana bad ka kam shna jri.
Ha kane ka prokram yn kynthup ïa ka jingleit jngoh ïa ka Cochin Port Trust, ban bud sa ka jingleit peit ia ka Kochi Water Metro, kaba kynthup ïa ka bynta High Court – Mattancherry. Ka kynhun kan leit jngoh ruh ïa ka Fort Kochi bad Mattancherry, kaba ailad ïa ki nongthoh khubor ban ïoh mad ïa ka jinghiar pateng ha ka thaiñ, ka kam kyntiew ia ka sor bad ki jingtei na ka bynta ki paidbah.
Hadien kane, ki nongthoh khubor kin leit jngoh ïa ka Naval Base Kochi bad ka Central Marine Fisheries Research Institute (CMFRI), Kochi, ban ïoh ïa ka jingsngewthuh shaphang ka bor jong ka India ha ki kam duriaw bad ka jingwad bniah kiba iadei bad ki jaka ri dohkha ha duriaw.
Kane ka kynhun kan leit jngoh ïa ka Cochin Shipyard, katkum ki jingpynbeit, bad ïa ka Cochin Special Economic Zone (CSEZ). Ia kane ka jingleit jngoh ia ka Cochin Shipyard la pynkhreh ha ryngkat bad ka ophis jong u Myntri ka sorkar pdeng ba dei peit ia ka tnat Ports, Shipping and Waterways.
Ka Press Tour kan kynthup ruh ia ka jingleit jngoh ia ka Rubber Board of India, Kottayam, kaba ai lad ia ki nongmihkhmat jong ki lad pathai khubor ban sngewthuh ia ka jingtreikam jong ka Board bad ki jingthmu kiba iadei bad ka roi ka par ha kaba iadei bad ka kam shna jri.
Kane ka Press Tour ka long shi bynta jong ki jingpyrshang kiba dang iaid shakhmat ban pynkhlain ia ka jingiadei jong ki lad pathai khubor bad ki jaka treikam jong ka Sorkar Pdeng bad ban ai ia ki nongthoh khubor na ka thain shatei lammihngi ia ka jingtip kaba beit, kaba naduh tynrai shaphang ki jingthmu bad ki projek kiba iadei bad ka roi ka par ha kylleng ka ri.
Kum kine ki prokram pynsaphriang khubor ki plié lad ïa ki nongthoh khubor kiba ïashim bynta ban wanrah ïa ki khubor ba ki sakhi dalade, ki khubor shaphang ka roi ka par bad ki jingshem jong ki nongshong shnong sha ki briew ha la ki jong ki jong ki Jylla, da kaba ïarap ban pynsngewthuh kham bha ia ki paidbah bad ka jingtip shaphang ki sienjam jong ka Sorkar India kiba idei bad ka roi ka par. Kane ka kynhun kan pyndep ia kane ka Press Tour ha ka 11 tarik u Nailur, 2026.
