Shillong, Nailur, 08: Ka Border Security Force (BSF) kala pynlong iaka Pension Adalat na ka bynta ban pynbeit mar mar ia kiba jingeh ha kaba iadei bad ka jingioh pension jong ki BSF ba la shongthait bad ki longiing kiba don kiba la shongthait bad kiba dei na ka jylla Meghalaya bad Assam.
La pynmih ia katei ka Pension Adalat lem bad ka jingthmu ban pynioh iaka pension bad kiwei kiwei iaka rynsan ba suk ban rung lane ban pyndonkam na ka bynta ban pynsngew bad ban buh iaki jingud lane ki jingeh ba iadei bad ka pension hakhmat ki bor ba dei peit bad ban pynsuk iaka jingshna lane ka jingpynbeit iaki da kaba kloi. Ka don ka jingthmu ruh ban pynthikna ba ki jingud bad ki mat ba kongsan jong kiba la shongthait kan treikam mar mar ha ka por ba biang bad ka rukom kaba dei.
Yn pynlong da ka prokram ha ka 11 tarik Nailur 2026 ha ka por 9:30 mynstep ha BSF Camp, Mawpat, Shillong bad ki nongiashim bynta ki long ki BSF Pensioners bad ki Family Pensioners na ka jylla Meghalaya bad Assam bad ka jingthmu ka long ban pynbeit hangto hangto iaki jingeh bad jingud jong kiba dei ban ioh iaka pension lane bai bam tymmen.
Ha ka por ba don ka Pension Adalat, ki nongioh pension bad ki iing ban ioh pension kin ioh ka lad ban pynpaw ki jingeh jong ki ha kaba iadei bad ka pension bad kiwei kiwei ki jingioh jingmyntoi na ka bor ba dei peit. Yn sa shimkhia haba la dep ioh iaki jingujor ba la pdiang, da kaba kynjoh thong ban pynbeit iaki jingeh syndon ha kajuh ka jaka, katba lah khamtam.
Ka Pension Adalat kan sa pynioh jingmyntoi ruh lem bad ka pynshai halor ki lad ki lynti, ki rukom treikam bad ki kabu ba lah ban pyndonkam ha ka ban pynbeit iaki jingmudui bad ki jingshitom ba iadei bad ka pension.
Kane ka sienjam ka pyni iaka jingkut jingmut bad ka jingkitkhlieh jong ka Border Security Force (BSF) na ka bynta ka bhalang jong ki nongioh pension bad ki pension longiing. Ka thmu ban pynbiang iaki iaka jingshakri bad ka rynsan ba kyrpang kaba suk ban ioh da ka thong ban pynbeit iaki jingkhuslai ne jingujor bad ki jingshitom kiba shisha jong ki.
Na ka liang jong ka Border Security Force, kala kyrpad ia baroh ki BSF Pensioners bad ki Family Pensioners ka jylla Meghalaya bad Assam ba kin shim ia kane ka kabu ksiar bad iashim bynta ha ka Pension Adalat na ka bynta ban pynpaw ki jingeh kiba iadei bad ka jingioh pension bad kiwei kiwei ki mat ba kongsan.
