Shillong, Nailur 07: U Vice-President jong ka India u C. P. Radhakrishnan, mynta ka sngi u la iashim bynta ha ka jingialang pdiang burom kaba la pynlong na ka bynta jong u da ki briew bad ka Sorkar Meghalaya ha Soso Tham Auditorium, Shillong. U la pynpaw ka jingsngewnguh ïa ka jingpdiang sngewbha bad ong ba un ïai don ryngkat bad ki briew jong ka jylla Meghalaya ha ka jingïaid lynti jong ka jylla sha ka roi ka par.
U Vice President u la ban jur ïa ka pateng tynrai ba riewspah jong ka Meghalaya, ka jingitynnad jong ka mariang bad ki jaka treikam ba kyrpang jong ka imlang sahlang, kynthup ïa ka rukom ai jait kmie jong ka. U la ong ba ki jaka treikam ba khlain jong ka Jylla ki pyni ïa ka jingiar bad ki riti dustur jong ka synshar paidbah jong ka India. Haba pynkynmaw ïa u paralok barim jong u ha Lok Sabha, u P. A. Sangma ba la khlad noh, u la batai ïa u kum u nongïalam ba radbah bad u shongknor uba tbit uba la noh synñiang shibun sha ka synshar paidbah.
U C. P. Radhakrishnan u la ong ba ka jinglong laitluid kaba shisha ha ka niam ka mut ban burom ia ki jingpyrkhat bad ki jingngeit jong uwei pa uwei. U la ban jur ba ki briew ki dei ban im lang da ka jingburom mar kylliang bad ka jingiasngewthuh jingmut. U la ban jur ruh ba ka roi ka par kadei ban long kaba kynthup lang bad ym dei ban iehnoh ia kano kano ka bynta jong ka imlang sahlang.
Haba kren shaphang ka jingdonkam jong ka jingpyniasoh, u Vice-President u la ong ba la pyrshang katba lah ban pyniasoh ia ki shnong kiba jngai bad ki sor bad ki nongbah. U la ong ba palat 46,000 km ki surok ha ki jaka nongkyndong la shna ha ka thain shatei lammihngi hapoh ka PMGSY ha kine ki shiphew snem ba ladep, da ka jingpynlut palat T.47,000 klur. U la ïaroh ruh ïa ka MoU ba ïadei bad ki jingpynkylla ba ka Meghalaya ka la wanrah hapoh ka Jal Jeevan Mission 2.0.
U Vice President u la buh ia ki mawnongrim na ka bynta san tylli ki projek kiba shongdor T.1,010.95 klur. Kine ki kynthup ïa ka New Shillong Water Supply Scheme Phase II, Part A (T.850.58 klur) hapoh ka Urban Challenge Fund, artylli ki projek pynïasoh surok hapoh ka NESIDS, ka jaka sumar AYUSH kaba don 30 jingthiah ha Shillong Civil Hospital bad ka substation kaba 132/33 KV ha Mawkhanu hapoh ka PM-DeVINE.
U la plie ruh ïa ka Maternity and Children’s Hospital ha Nongstoiñ, kaba la pyndep ha ka jinglut kaba T.31.05 klur hapoh ka National Health Mission. U la ong ba ki projek, baroh ki shongdor kumba T.1,042 klur, kin pynkhlain ia ka jingpynpoi um, ka jingpyniasoh, ka koit ka khiah bad ki jingdon jingem ba iadei bad ka bording ha Meghalaya.
U Vice-President u la ïaroh ïa ki sienjam jong ka Sorkar Jylla ha kaba iadei bad ki jingdon jingem bad ka kam jngohkai pyrthei, kynthup ïa ka prokram homestay, ka CM-Elevate bad ka Green Meghalaya. U la ai khublei ïa u Myntri Rangbah ka Jylla u Conrad K. Sangma, ïa ka kynhun Myntri jong u bad ïa ki briew jong ka Jylla Meghalaya na ka bynta ka jingkiew shaphrang jong ka Jylla.
Haba ai jingkren halor ka jingthmu jong ka Viksit Bharat shuwa u snem 2047, u C. P. Radhakrishnan u la ban jur ba ka jingkiew shaphrang kadei ban long kaba kynthup lang ia baroh, khlem da iehnoh shadien ïa kano kano ka bynta jong ka imlang sahlang, katba dang pynneh pynsah ïa ka mariang, ka kolshor bad ki riti dustur ba riewspah jong ka Meghalaya. Haba kren shaphang ki jingkieng jri jong ka Jylla bad ka jingitynnad jong ka Sohra bad Mawsynram, u la ong ba ka Meghalaya ka ai ki jinghikai kiba kordor ban im ha ka rukom ba iahap bad ka mariang.
Ha kane ka sngi la iadonlang u Myntri Rangbah ka jylla u Conrad K. Sangma, ki Symbud Myntri Rangbah ka jylla u Bah Prestone Tynsong bad u Bah Sniawbhalang Dhar, u Myntri Bah Sanbor Shullai, Chief Secretary Dr. Shakil P. Ahammed bad kiwei kiwei ki kynrem ki lyndan.
