Shillong, Nailut 09: Ki nongthoh khubor na Meghalaya bad Sikkim ki la ioh ban sakhi ia ka jingtbit bad ka jinglong thikna kaba don ha lyndet jong ki jingtreikam jong ka Indian Navy ha Kochi ha ka sngi Ba-ar, da kaba sakhi ia ka jingpynwandur ia ka jingkieng bad iohi ia ki rukom pyniaid ia ki lieng, ka jaka buh ia ki helicopter bad ka jaka ieng helicopter ha ka lieng jong ka Indian Navy.
Ha kane ka jingleit jngoh, kaba long shi bynta jong ka Press Tour jong ka Press Information Bureau (PIB) sha Kerala, ka la ai ïa ki ïa ka jingsngewthuh kaba kham bha shaphang ka teknoloji, ka jinglong ryntih bad ka kam jong ki briew ha ka jingim bad ki jingtreikam ha duriaw.
Ka jingleit jngoh ka la sdang na Navigation and Direction (ND) School, Kochi, ha kaba u Captain Rahul Pawar, Ophisar-in-Charge, ND School, u la batai ia ki nongthoh khubor halor ka jingai jinghikai ba kyrpang ba la ai sha ki shipai duriaw bad ka bynta ba kongsan jong ka jingpyniaid ia ki kam ha duriaw. U la batai kumno ka jinghikai ha ki kamra pule, ki jingpyrshang bad ka jingai jinghikai ba la pyndonkam da ka teknoloji ki pynkhreh ïa ki briew ban pynïaid ïa ki lieng hapoh ki jinglong jingman bapher bapher bad kiba kham jynjar ha ka duriaw.
La pynshai ruh ïa ki nongthoh khubor shaphang ka Integrated Simulator Complex ‘Dhruv’ ha Southern Naval Command, kaba kynthup ïa ka Astronavigation Dome kaba la batai da ka Tnad Kam Iada Ri kum kaba nyngkong eh ha ka Indian Navy. Kane ka jaka ka don ia ki simulator kiba plié lad ban ioh jinghikai ha ka jingpyniaid ia ki lieng, ki kam jong ki kynhun jong ki lieng bad ki rukom treikam jong ka navy. Ka jingpynshai ka ban jur kumno kum kane ka teknoloji ka iarap ïa ki shipai ban pyrshang ia ki kam kiba jynjar ha ka jinglong jingman kaba shngain kaba plié lad ia ki ban kham pyntbit ialade.
Ka bynta kaba kongsan ka long ka bridge simulator kaba dang shu plie thymmai ha ka ND school, ha kaba ki nongthoh khubor dalade ki la sakhi ïa ki jingeh ban pynïaid ïa ka lieng na ka bridge jong ka. Ha ka jingpyrshang dalade ia kane ka lad digital, ki la ioh ban sakhi ia ka jinglong jong ki kam duriaw, ka jingpyniaid ia ki lieng, bad ban peit ia ki jingkylla ha ka kam pyniaid lieng. Kane ka jingsakhi dalade ka ai ia ki ia ka jingsngewthuh kaba kham jylliew ia ka jingpynleit jingmut, ka jingiatreilang bad ka jingshim kloi ia ka rai kaba donkam ban pyniaid ia ka lieng ha ka duriaw.
Hadien kata la batai ia kane ka kynhun shaphang ka astronavigation, bad ki la iohi kumno ngi lah ban pyndonkam ia ki met bneng kum ki dak ban sngewthuh hangno ngi don. Ka jingïakren ka la ban jur ïa ka jingïadei kaba dang ïai bteng jong kane ka jingtbit tynrai ryngkat bad ki kor pynïaid lieng kiba mynta, kaba la ai ïa ki nongthoh khubor ïa ka jingsngewthuh shaphang ka rukom ba ka jingstad tynrai bad ka teknoloji ba mynta ki ïarap iwei ïa iwei pat ha ki kam jong ka Navy.
Hadien kane ka kynhun ka la leit jngoh ïa ka INS Sunayana, ha kaba u Lieutenant Naorem Nivash, ASW Officer, u la batai ïa ki halor kane ka jhad, ka bor jong ka bad ka bynta treikam jong ka. La ialam ia ki nongthoh khubor sha ka jingkieng jong ka lieng, ha kaba ki la iohi ia ki rukom pyniaid ia ki lieng bad ki la ioh ia ka jingsngewthuh kaba kham bha shaphang ka jingbun ki bynta ban pyniaid ia ka lieng jong ka Indian Navy ha duriaw. Ki la leit jngoh ruh ia ka jaka buh helicopter bad ka jaka pynher helicopter, da kaba ioh ia ka jingsngewthuh shaphang ki jingdonkam bad ki jingpynbeit kiba iarap ia ki kam pynher liengsuin na ki lieng.
Ka jingïakren bad ki shipai duriaw ha ka por jingbam ka la wanrah ia ka jingsngewjan ha kane ka jingleit jngoh, kaba la ailad ïa ki nongthoh khubor ban tip shaphang ka jingim ha ka lieng, ki rukom treikam jong ki shipai ha duriaw bad ki jingshem jong ki haba ki shakri ha ki lieng jong ka Indian Navy.
Kane ka jingleit jngoh ka la kut noh ha Indian Naval Maritime Museum ha INS Dronacharya, ha kaba u Commander Repsol Raj, Ophisar-in-Charge, Museum, u la batai lyngkot ïa ka kynhun halor ka kam duriaw jong ka India. Lyngba ki dur, ki model, ki jingpyni bad kiwei kiwei ki tiar, ki nongthoh khubor ki la iohi ia ka jingkylla jong ka bor jong ka Indian Navy bad ka jingïadei kaba la slem bha jong ka ri bad ka duriaw.
Ka jingshem ha kane ka sngi ka la ïalam ïa ki nongthoh khubor lyngba ka jingïaid lynti ba pura—naduh ka jingai jinghikai ia ki shipai duriaw bad ka jingpynïaid ïa ki lieng da ki simulator haduh ka astronavigation, ka lieng kaba treikam bad ka pateng jong ka kam duriaw.
Ka lad ban pyrshang ïa ka simulator, ban iohi ïa ki rukom treikam ba shisha ha ka lieng jong ka Indian Navy bad ka jingiakren bad ki shipai ka la ai ïa ki nongmihkhmat na ka kam pathai khubor ïa ka jingsngewthuh ka bym sahkut tang ha ka jingbatai ba lyngkot, kaba la ïarap ïa ki ban sngewthuh ïa ka jinglong kaba thikna, ka jingpynkhreh bad ka jingaiti kaba kongsan bha ha ki jingtreikam ha duriaw.
