Shillong, Nailur 09: Ha ka jingthmu ban pynroi iaka jingpynkiew iaka jingialehkai martial arts bad ka sport ha India, u Myntri Rangbah ka jylla Meghalaya, u Conrad K. Sangma, u la mynjur ban shimti iaka kam kum u Chairman ka United Muay Thai Association of India (UMAI).
Ka United Muay Thai Association of India (UMAI) ka dei ka seng kaba ka ithuh ha baroh kawei ka Ri India bad kaba peit iaka jingshad bad jingialehkai dei ka Muay Thai ha India. Iaka UMAI la ithuh pyrthei da ka International Federation of Muaythai Associations (IFMA) naduh ka snem 2019. Kane ka IFMA ka dei pat ka seng ba la ithuh da ka International Olympic Committee.
Katba u Dr. ShriRam Choudhary, General Secretary, UMAI u la pynpaw ka jingsngew nguh ia u Myntri Rangbah ka katei ka jingkubur jong u, da kaba ong ba ka jinglong kum u nongialam khmat bad ka jingiohi jngai jong u Conrad K. Sangma kan kyntiew iaka Muay Thai, kaba dei ka rukom ialehkai kynjat bad tied kaba wan hi na ri Thailand, kan wanrah iaka jingroi bad ka jingsngewbha kaba khraw ia kane kawei na ki jait ialehkai block-sports kaba kham roi stet tam ha ka pyrthei mynta.
Iaka Muay Thai, la bun ki nongiashim bynta na kylleng ka Ri India bad kala pawnam wat shabar ka Ri India lyngba ka jingshah pyn kynthup jong ka ha ki tamasa ialehkai ka bakhraw. Katba ka Meghalaya kala long kum kawei na ki jylla ba la lah ban iakehkai ha kum kane jait jingialehkai, lem bad ki nongialehkai na Meghalaya kiba la iohpdiang haduh palat 50 tylli ki medals ha ki lympung iakhun jong ka ri bad shabar ka Ri India, kaba kane ka pyni iaka jingpyni sap ka jong ki bad ka jingkiew jong ka jingiashim bynta.
Ki nongjop ba dang shu jop jong ka Muay Thai kila shah ai khublei mynta ka sngi da u Myntri Rangbah ka jylla Meghalaya, ha ka Sports Edition jong ka CM Connect: ki nongjop jong mynta u bnai. Ka Muay Thai ka dei kawei na ki jait ialehkai ba la tyrwa ban pynrung ne pynlong ha ka 39th National Games, kaba ka jylla Meghalaya kala kloi ban pdiang bad pynlong ha u snem 2027.
Ka jingpyn kynthup iaka jingialehkai Muay Thai ha ka National Games kan pynioh iaka rynsan kaba kongsan tam na ka bynta ki thei bad ki rang iakehkai na kylleng ka Ri India ba kin iakhun ha ki bynta ki bakhraw katba kane ka jait jingialehkai kan pynkiew iaki samla bad pynskhem iaka burom jong ka jylla Meghalaya baroh kawei bad kan pynioh iaki ba kin ioh iashim bynta ha ki jingiakop bad kan kyntiew iaki jait jingialehkai bad ki kam sport kiba dang mih thymmai.
La ithuh ia kane ka sport da ka kynhun ialehkai jong ka pyrthei baroh kawei kum ka International Olympic Committee, Olympic Council of Asia bad la pynlong ha ka World Games, 3rd Asian Youth Games bad ruh ha ka 2024 Paris Olympics kum ka jingialehkai pyni.
Kane ka jingthung kam ka pyni iaka jingroi ka jylla Meghalaya kum ka jaka iaid paidbah ha ki kam ialehkai bad ka pynskhem iaka jingskhem ka sorkar jylla ban kyntiew iaki jait ialehkai bapher bad ban pynmih ki lad ki kabu iaki samla ha ka ri baroh kawei.
