Shillong, Nailur, 18: U Superintendent ki pulit ka tnad pyniaid kali ka East Khasi Hills distrik u Hari Prasanth u la ong katba ki dang pynlong iaka jingtalasi iaki kali kiba iaid ba ieng ha ka surok Demseiniong kaba kila sdang naduh ka por 11 baje mynmiet haduh 2 baje mynstep.
Haba kren ha ki lad pathai khubor, u Superintendent ki pulit ba dei peit iaka jingpyniaid iaki kali ha kane ka nongbah Shillong, la ong ba ha ka por 1.30 baje mynstep kawei ka scooty kaba ar ngut ki nongshong ki pulit kila pynsangeh hynrei la leit tynrah ia u Additional SP ka tnad pyniaid kali bad ha kane ka jingjia, utei u heh pulit u la mynsaw.
Ki pulit kila ioh ban kem ia baroh ar ngut bad la kurup ruh iaka scooty bad ki pulit kila registar iaka ejahar ha kiba bun ki kyndon bad khamtam eh ha ki kyndon ba ki don ka jingthmu ban shim iaka jingim briew bad ha ki kyndon ba kila pynmynsaw iaki briew ka ain.
Na ka liang ki pulit, mynta ki dang pynlong iaka jingtohkit bad kaei kaba ki kren ka long halor ki sabut ba kila ioh ia kaba ym pat lah ban iathuh paidbah, ia kine baroh ar ngut la rah sha iingbishar mynta ka sngi bad ka iingbishar kala phah sha ka judicial custody na ka bynta 14 sngi ban tohkit.
La iathuh ba u Additional Superintendent ki pulit, u Lovish Garg u la mynsaw na ka kjat bad kumjuh na ki bynta jong ka khlieh bad la rah ia u mar mar sha hospital ban ioh iaka jingsumar.
