Shillong, Nailur 18: Ki nongthoh khubor na Uttar Pradesh, ha ka Press Tour ba la pynlong da ka Press Information Bureau (PIB), Sorkar India, ki la leit jngoh ia ka shnong Siej kaba don ha East Khasi Hills bad ki la iakren bad u Bah Hally War uba la ioh ia ka khusnam Padma Shri, uba la ialam ia ki sha ka Jingkieng Jri ha Umkhar.
Ha kane ka jingleit jngoh, u Bah War u la batai kumno ïa ki tynrai kiba don halor jong u dieng jri (Ficus elastica) la pyniaid bad sumar bha da ki snem ban pynlong ïa ki jingkieng lyngba ki wah bad ki jaka kiba jynjar kiba ki briew ki lah ban pyndonkam. U la iathuh ruh kumno u la nang ia kane ka rukom shna tynrai na u kpa bad u kpa tymmen jong u bad u la aiti da ki phew snem ban pynneh pynsah ia kane ka jingstad tynrai bad ban hikai ia kiwei shaphang kane.
Lyngba ka jingiaid ryngkat bad u Bah War sha Umkhar, ki nongthoh khubor ki la peit bniah ia ka jingkieng jri bad ki la sakhi ia ka mariang sawdong jong ka shnong Siej. Ki la pynpaw ka jingsngewnguh ïa ka lad ban sakhi ïa kane ka dustur tynrai ha ka jaka ba ki don bad ki la ong ba ka jingïakren ka la ai ïa ki ïa ka jingsngewthuh kaba kham bha shaphang ka jingïadei kaba jan hapdeng ki jaitbynriew Khasi, ka mariang jong ki bad ka jingstad tynrai.
Ki nongthoh khubor ki la ai khublei ruh ïa ka jingstad bad jinglah ban pynneh pynsah ïa ka dustur shna jingkieng dieng jri, da kaba ong ba ki jingtei ki pyni ïa ka jingnang jingstad jong ka imlang sahlang kaba la slem bha ban trei bad ka mariang. Ki la ai khublei ia u Bah War uba la iasam ia ka jingtip bad ka jingiaid lynti shimet jong u bad ki la pynkup burom ia u kum ka jingithuh ia ki jingpyrshang jong u da ki phew snem ban pynneh pynsah ia ka dustur tynrai. Ki la ai khublei ruh ia u ha ka jingioh ia ka khusnam Padma Shri ha u snem 2026.
Ki nongmihkhmat na ka Information and Public Relations (DIPR), Sorkar Meghalaya, ki la synranlang ia kane ka kynhun ki nongthoh khubor ha kane ka jingleit jngoh.
Kane ka jingleit jngoh ka la long shi bynta jong ka PIB Press Tour kaba thmu ban ailad ïa ki nongthoh khubor ba kin iohi markhmat ïa ka kolshor jong ka Meghalaya, ka jingstad tynrai, ka mariang bad ki sienjam ba iadei bad ka kam jngohkai pyrthei ba la pynshong nongrim ha ka imlang sahlang.
