Delhi, Nailur, 21: U Myntri ka rep ka riang bad ka bha ka miat jong ki nongrep, u Shivraj Singh Chouhan u la hukum ban phah weng noh mar mar ia uwei u ophisar ba tip kyrteng u Anurag, uba dei u Marketing Officer ha ka tnad ka rep ka riang na ka daw jong ka jingioh jingujor ba u la bam pisa na ki ar tylli ki jaka ba buh mar ha Sehore district jong ka Madhya Pradesh.
Katkum katei ka jingujor, la ong ba utei u ophisar u la dawa pisa beain ha ka por ba don ka jingjurip ha Sehore district ha ka jaka jong ka jingpyllait iaka pisa ba tam lane ka subsidy kaba la kit haduh T. 1 lak na ka Shivay Warehouse ha Bhairunda tehsil, katba iaka T. 60,000, la ioh na ka jaka buh mar jong u Krishna ha ka shnong Beherakhedi kaba hap ha Rehti.
Ia katei ka jingujor, la bna da utei u Myntri ka rep ka riang, u Shivraj Singh Chouhan. Kumta ia katei ka jingshah kynnoh, une u Myntri u la hukum mar mar ban shimkhia ia kane ka jingjia. Hadien katei, ia u Marketing Officer, u Anurag la weng kam shipor hangto hangto.
Kane ka sienjam ka pynshisha ruh iaka nongrim ka tnad ba ki jingujor halor ki kam bamsap ne ka jingshim pisa ha ki kam sorkar kiba iadei bad ki nongrep bad kiwei kiwei, yn shimkhia bad yn pynngat ha ka jingpynshitom mardor.
