Shillong, Nailur 21: Ka Khasi Students’ Union (KSU) Central Executive Council mynta ka 21 tarik u Nailur 2026 ka la ai da ka Legal Notice sha u Mr. Dangsan Khyriem, MPS, Superintendent of Police (Shillong City) bad u Mr. Hari Prasant M.R., IPS, Superintendent of Police (Traffic), East Khasi Hills District, halor ki jingkynnoh bad jingpyllait khubor sha ki lad pathai khubor hadien ka jingjia kaba la jia ha ka 18 tarik u Nailur 2026 ha jan Samkhamti Petrol Pump, Urkaliar. Ia kane ka Legal Notice la phah lyngba u Advocate ka seng, ha ka kyrteng jong ka KSU Central Executive Council.
Katkum ki jingshisha ba la pynpaw ha ka Legal Notice, ha ka janmiet jong ka 18 tarik u Nailur 2026, ki pulit katba ki dang pynlong ïa ka naka checking kum shi bynta ban peitngor iaka suk ka sain ha nongbah shillong, ha kaba ar ngut ki briew kiba shong ha ka scooty kumba ki la kynnoh ba ki pyrshang ban lait na ka jaka checking bad hadien kata ki la leit tynrah ïa u Additional Superintendent of Police (Traffic), East Khasi Hills, kaba la pynmih ïa ki jingmynsaw ia une u heh pulit ba don ha ka duty. Hadien kata, ki pulit ki la iohkem ïa kitei ki ar ngut, ki la kurup ïa ka scooty bad ki la pynmih ïa ki ha khmat ka Ïingbishar katkum ka ain.
Hynrei, ka KSU ka la pynpaw ïa ka jingsngewkhia kaba jur halor ki jingkynthoh bad jingkynnoh kiba la mih ha ki lad pathai khubor, ha kaba kitei ki ar ngut kiba la shah kem ha kaba ïadei bad kane ka jingjia ki la pynïadei ne pynsuba ba ki long ki dkhot jong ka seng.
Ka KSU ka pynpaw shai ba ym don kano kano ka sakhi kaba shai, kaba lah ban pdiang ha ka aiñ bad kaba pynshisha ba kitei ki ar ngut ki long ki dkhot ne ki don jingïadei bad ka KSU. Kumta, ka Legal Notice ka dawa ban pynshai halor ka nongrim bad ka jingpynshisha kaba la pyndonkam ban pynïadei ïa kitei ki briew bad ka KSU ha khmat paidbah lyngba ki lad pathai khubor.
Ka seng ka pynshai ruh ba kane kam dei satia ka jingpyrshang ban khanglad ïa ka jingtohkit jong ki pulit ne ban ktah ïa ka jingbishar halor ka jingjia jong ka 18 tarik u Nailur.
Hynrei, ka nongrim jong ka KSU ka long ba ka jingkitkhlieh jong kano kano ka kam runar ka dei ban shong halor ki sakhi bad ka rukom treikam kaba katkum ka aiñ, bad ym dei ban pynïadei ïa ka seng bad kano kano ka kam runar tang halor ka jingsuba ne ki jingtip kiba khlem pat lah ban pynshisha.
Ka KSU ka pynpaw ruh ba ka jingpynïadei ïa kitei ki briew bad ka KSU khlem ka jingpynshisha kaba biang ka lah ban pynsniew ïa ka nam, ka burom bad ka jingshaniah paidbah ïa ka seng bad ïa ki dkhot jong ka.
Kumta Lyngba kane ka Legal Notice,ka seng ka ai por hapoh 15 sngi naduh ka sngi ba ki la pdiang ïa ka Notice bad kin ai ka jingpanmap paidbah, ban pynmih da ka jingthoh paidbah bad ban pynlong ïa ka jingpynshai bad jingpanmap ha ki lad pathai khubor sha ka KSU, halor ki jingkynnoh ïa ki dkhot jong ka seng bad kane ka jingjia, bad ban pynmih ïa kane ka jingpynshai ha ki lad pathai khubor .
Ban sangeh bad ban ym pynmih shuh ïa kino kino ki jingkynthoh kiba bakla, kiba khlem pat lah ban pynshisha ne kiba pynsniew ïa ka burom jong ka KSU, ki dkhot jong ka ne ka jingpynïaid jong ka seng, ha ki jaka paidbah ne kiwei pat ki lad bad ki khubor ruh.
Ka Legal Notice ka pynbna ruh ba lada ym pyndep ïa kine ki jingdawa hapoh ka por ba la buh, ka KSU kan hap ban shim ïa ki sienjam kiba biang ha khmat ka aiñ, kynthup ïa ka criminal proceedings katkum ka aiñ, halor ki jingkynnoh ba ki jingkynthoh ki long kiba pynsniew nam iaka seng baroh kawei.
Ka Union ka pynpaw shai ba ka burom ïa ka jingtohkit bad ïa ka jingtreikam jong ka Ïingbishar halor ka jingjia jong ka 18 tarik u Nailur 2026. Hynrei, ka jingpyndonkam ïa ka aiñ ka dei ban long kaba ïaryngkat ïa baroh bad ki jingkynthoh paidbah na ki bor pulit na ka sorkar bad kiba dei peit ki dei ban shong halor ki jingshisha kiba la pynshisha bad ki sakhi kiba biang.
Namarkata, ka KSU ka dawa ïa ki bor pulit bad ka sorkar kiba don bynta ba kin ai jubab bad pyndep ïa ki jingdawa hapoh ka 15 sngi katkum ba la kdew ha ka Legal Notice. Lada ym don ka jingpynbeit hapoh kane ka por, ka seng kan shim ïa ki sienjam kiba kham eh shuh shuh katkum ka aiñ kiba don ha ka kti jong ka, kane ka long katkum ka kyrwoh kaba la phah da u samla Pynshai Kupar M Dkhar Information bad Publicity Secretary ka KSU CEC.
