Shillong, Risaw 08: Ka Seng KSU ka pynrem jur ïa ka jingpyrshang jong u Myntri ka tnad kam Pohiing ban pyniasnoh ïa ka rally jong ka KSU kaba la long ha ka 19 tarik Nailar bad ki kam lum pisa be-aiñ jong ki pulit kiba hap hapoh ka jingpeit bad jingkhmih jong u lyngba ki lad pathai khubor ba u la kren ha ka 6 tarik u Risaw 2026.
Ki san tylli ki mat kiba ka KSU ka dawa na ka Sorkar, ki dei kiba shong nongrim, na bynta ka bit ba biang ka jaitbynriew. Ka jinglum pisa be-aiñ ne ka jinglong bakla jong ki pulit bad ka jingïakhih paidbah jong ka KSU ki dei ki mat kiba ïapher.
Ka jingïasnoh ïa kine baroh kam pynjah ïa ki jingkylli kiba paidbah ki buh ïa ka tnad kampoh iing, hynrei ka pyni tang iaka jinglong khynnah ka jong u kum u nongmihkhmat paidbah ban da rapjot.
Ka KSU kala pynkynmaw ia kaei kaba u bah Prestone u ong hikai shwa ban kren da pyrkhat shispah sien. Lym kumta, ki kyntien kiba phi thmu ban ïada ïa ki ba don kti bad iaphi ki lah ban wanphai biang bad ktah ïa phi kham jur ban ïa ka jingkylli kaba phi pyrshang ban phet na ka.
Lada ka tnad kam poh iing kala poi haduh u pud ba kam lah shuh ban pynbeit ne ban ai jubab shai halor ka jingleh jong ki briew kiba hap hapoh ka jingpeit jong ka, te ka jingkylli kaba paidbah ki dei ban buh kam dei shuh “Mano kita ki nongpynkulmar ha ka rally jong ka KSU?” hynrei “Mano hi u nongpeit bad nongkitkhlieh ïa ka tnad kam poh iing.
Ka KSU ka ong ba bad lada ka jingïalam ïa ka tnad kam poh iing kala long kaba eh palat, ka don ka lynti kaba don burom, kata da kaba hiar noh na ka Shuki.
Ka KSU kan ym shah pynphai lynti haba la don bad iohi paitbah ki pulit ki la lum pisa be-aiñ, te to tohkit mano ba la ai jingbit, tohkit mano ba la ïoh jingmyntoi, bad shim ïa ka sienjam katkum ka aiñ, ong u Pynshai Kupar M Dkhar information bad Publicity Secretary KSU CEC.
