Shillong, Risaw 17: U Myntri rangbah ka jylla, u Conrad K Sangma, mynta ka sngi u la ia sakhi lang iaka sngi jong ka jingdap 15 snem jong ka Mawkyllei College naduh ba la sdang iaka ha kane ka sngi u Myntri rangbah u la pynbna ba un ai T. 25 lak na ka skhim Chief Minister Special Grant, ha ka jingia don lang u MLA kane ka jaka, u bah Shakliar Warjri.
Haba kren ha kane ka jingialang, u Myntri rangbah u la ong ba dei ban kynnaw iaki nongseng iaka kolej, iaki nongkyrshan, iaki nonghikai kiba la trei shitom bad kumjuh iaki bahaiing ha sem jong ki khynnah pule kiba la ai ka jingshaniah ia kane ka kolej.
Ha kane ka sngi, u Myntri rangbah u la pynkynmaw ia u synniang u bynhei kaba u bah Hopingstone Lyngdoh bam kwai ha dwar u blei u la noh sha kane ka kolej uba dei u nongseng uba dei ruh uwei na ki nongialam ba radbah jong ka jylla.
U la pynkynmaw ba u kpa jong u u Purno A. Sangma bam kwai ha dwar u blei u don ka jingiajan bad u bah Hopingstone bad kumjuh na ka liang jong u ruh, u don ka jingiajan bad une u riewkhraw.
Haba phai ha ka pule puthi, u la iathuh ba ka sorkar kala buh iaka tnad pule puthi hakhmat eh namar ki sngewthuh ban rah iaka jylla sha ki kyrdan ba halor donkam iaka jingnang jingstad bad lyngba ka pule puthi, lah ban wanrah ia shibun ki jingkylla ha ka imlang sahlang, dei na kata ka daw ba naduh u snem 2018 ba ki wan ha ka bor synshar kila lah ban leh shibun ki kam ha ka pule puthi.
Ka tnad pule puthi kam dei ka tnad sorkar kaba suk ban pyniaid ka don shibun ki jingeh bad ban weng ia kine ki jingeh, donkam ban iatreilang la iathuh ba ka sorkar kala shim iaki lad ki lynti ban pynioh sha baroh ban pule sha ki kyrdan ba shalor da kaba plie iaki kolej ha kylleng ki bynta jong ka jylla khnang ban ki samla pule kin ioh ban pule ha la ki jong ki dong bad ki jaka.
Haba pynkut iaki jingkren jong u, u la ong ba kine ki 15 snem ba la leit kala wanrah iaka mynsiem iatreilang kum ki paidbah haba iadei bad kane ka kolej bad u la kyntu ba kane ka jingiatreilang kan dang iai bteng ba nangne shakhmat ban dang lah ban ai ki jinghikai kiba kham bha. Iaka kolej la sdang ha ka 6/Jylliew/2011 bad mynta kala don 150 ngut ki khynnah pule bad 18 ngut kiba trei ha kane ka kolej.
