Ampati, Risaw, 16: U Nirmal Koch jong ka Tura bad Meghalaya uba dei u nongthoh poitri, nongthoh kot bad u stad wad bniah u la iohpdiang iaka Sahitya Award 2026 da u Sahitya Charcha Kendra, Assam, ha ka jingithuh ia u na ka bynta ka jingnoh synniang jong u ba la slem ha ka thoh ka tar bad ki jingtrei shitom jong u ban pynneh pynsah iaka ktien Koch, ka thoh ka tar bad ka lawbei tynrai bad u la pyniasoh ha ka thoh ka tar bad ka riti ka dustur hapdeng ka jylla Assam bad Meghalaya.
La rakhe ia katei ka sngi ha ka por ba kala dap 9 snem ka tamasa Sharatar Duporiya, kaba la long ha Schemio Global School ha Azara ha ka sngi thohdieng. La pynlong ia kane ka jing sam khusnam ha ka por 10 baje mynstep hapoh ka jingpyniaid jong u President, u Kumar Dipak Das, President ka Sahitya Charcha Kendra, Assam, kaba u la pyllait iaki kot, jingput jingtem bad ki poitri.
La don lang da ki riewpawkhmat ba kynthup iaka Nandita Devi, Dr Sarat Chandra Rabha bad u Dr Dipamani Haloi Mahanta bad u Koch u la iohpdiang ia katei ka khusnam Sahitya Award 2026, katba u Jayanti Deep iaka Rajen Pam Artist Award 2026.
U Koch uba dei na ka Ri Lum Garo, u la shem iaka jingthoh bad ka jingpynneh pynsah iaka ktien Koch, ka thoh ka tar, jingrwai tynrai bad kiwei kiwei. Katba ki jingshemphang jong u ki kynthup iaki jingthoh shaphang ka kynhun ka imlang sahlang, ka jingsdang bad ka jingdon jong ki Koch, lem bad ki jingrwai tynrai, jingshad bad ki tamasa.
Ha ki jingthoh jong u, u Koch u la pyni iaka jingiajan jong ka imlang ka sahlang bad ka mariang bad ka rukom long jong ka, kynthup iaka jingthung jingtep, jingpom dieng bad ki jingrwai Ri Lum. U la thoh ruh shaphang jong ki jingbam, jingdih bad kiwei kiwei ki riti ki dusturm kaba u la lah ban iarap ban pynneh pynsah iaka jingriewspah ka riti ka dustur jong ka imlang ka sahlang na ka bynta ka pateng kaban sa wan.
Katba ki jingthoh jong u shaphang jong ka jinglong jingman jong ka imlang ka sahlang ki Koch ha ka Ri Lum Garo bad ka tamasa Pabuni kala ioh jingiaroh. Nalor jong ka jingshem jong u bad kiwei kiwei ki jingnoh synniang, u Koch u la don bynta ruh ha kaban bniah ia bun tylli ki jingjia, ki kot magazine bad ka jingpyllait iaki kot sah jingkynmaw. Kala don ka jingiatreilang jong u ruh bad ki riewshemphang ba stad nabar ri ha kaban thoh bniah iaka ktien Koch sha ka ktien phareng bad kane ka long ruh kaba u la lah ban pynneh pynsah iaka ktien Koch.
Kane ka pyni ba u Koch u la lah ban kyntiew iaka jingsngewthuh iaka riti ka dustur bad ka jingiadei paralok hapdeng ka jylla Assam bad Meghalaya. Ia katei ka tamasa, la pyniaid da ka Sahitya Charcha Kendra, Assam, Guwahati-17. Katba kiba don bynta lang ha kane ka tamasa ki long u Dr Paritosh Chakraborty bad u Dr Bhavesh Das.
