New Delhi, Naiwieng 02: Ka Tnad Kam Pynroi Nongkyndong jong ka Sorkar Pdeng ka la pynmih ïa ki kyndon thymmai kiba tip kum ka Viksit Bharat – Guarantee for Rozgar and Ajeevika Mission (Gramin): VB–G RAM G – Grievance Redressal Rules, 2026, ban wanrah ïa ka rukom treikam kaba ryntih bad kaba kynthup ïa ki kyrdan bapher bapher na ka bynta ban pynbeit ïa ki jingmudui kiba ïadei bad ka jingpyntreikam ïa kane ka skhim.
Ka jingthmu jong kine ki kyndon thymmai ka long ban pynsuk ïa ki paidbah ban buh jingmudui, bad ban pynthikna ba ka jingbishar ïa ki jingmudui kan long kaba khuid, kaba don ka jingkitkhlieh bad kaba pynbeit ïa ki jingeh hapoh ka por ba la buh. Kane kan ailad ruh ïa ki bor ba dei khmih ban shim ïa ki sienjam kiba donkam halor ki jingmudui ba la pdiang.
Kine ki kyndon ki wanrah ïa ka rukom treikam ban bishar bad pynbeit ïa ki jingmudui katkum ki por ba la buh da ka Sorkar Jylla ha ki kyrdan Gram Panchayat, Block bad District.
Yn thung ïa ki ophisar ba kyrpang (Grievance Redressal Officers) kiba donkam ban pdiang, pynrung kyrteng, tohkit, bishar bad shim ïa ki rai halor ki jingmudui kiba la pdiang ha ki kyrdan treikam bapher bapher.
U District Programme Coordinator un khmih ïa ki jingmudui ha ka kyrdan distrik, ban pynthikna ba ïa ki jingmudui la pynbeit lyngba ki sienjam treikam kiba la buh bad ki rynsan digital (Digital Public Infrastructure).
Ban pynsuk ïa ki paidbah, uno uno u briew u lah ban buh jingmudui halor kano kano ka bynta kaba ïadei bad ka jingpyntreikam ïa ka skhim. Kine ki kyndon ki ailad ïa ki paidbah ban buh jingmudui lyngba ki lad bad ki jaka treikam bapher bapher.
Ki nongshong shnong ki lah ban buh jingmudui, Ha uno uno u Grievance Redressal Officer; Lyngba ka Speed Post na ka Iing Dak , ryngkat bad ka jingpynbna ba la pdiang ïa ka jingmudui; Lyngba ka rynsan digital kaba tip kum ka Digital Public Infrastructure for Redressal of Grievances, kaba la thaw da ka Sorkar Pdeng; bad Lyngba ki telephone, ki nombar helpline bad kiwei ki lad treikam katkum ki rukom ba la buh da ka Sorkar Jylla.
Ki jingmudui kiba la pdiang ha ki Gram Panchayat, Block bad District dei ban pynrung ha ka rynsan Digital Public Infrastructure ha kajuh ka sngi ba la pdiang ïa ki. Lada ym lah ban leh kumta na kino kino ki daw, dei ban pynrung ïa ki ha ka sngi trei kaba bud.
Hadien ba la pynrung kyrteng, u nongmudui un ïoh ïa ka resit pynshisha ba la pdiang ïa ka jingmudui, kaba kynthup ïa u nombar rejistar, ka tarik ba la pynrung ia ka jingmudui bad ka kyrdan jong u ophisar uba la pdiang ïa ka jingmudui.
Yn phah ruh ïa ka jingpynbna lyngba ki lad teknoloji ban pyntip ba la pdiang ïa ka jingmudui, la ka long kaba la pdiang lyngba ki rynsan digital ne kaba la aiti da ka met ha kano kano ka ophis treikam.
Kawei na ki bynta kiba kongsan jong kine ki kyndon ka long ba yn ym lah ban kyntait ban pdiang ïa kano kano ka jingmudui tang namar ka jingbym biang jong ka rukom thoh, ka rukom aiti ïa ka jingmudui ne ka jingbym bud ryntih ïa ki kyndon ba la buh.
Kane ka kyndon ka pynthikna ba ki paidbah kin ïoh ïa ka lad ban buh ïa ki jingmudui jong ki khlem da shah khanglad tang namar ka jingbym lah ban bud pura ïa ki rukom treikam ba la buh.
Kine ki kyndon ki kdew shai ïa ka rukom treikam bad ka por ba la buh ban bishar bad pynbeit ïa ki jingmudui. U ophisar ba la bynshet (Grievance Redressal Officer) u donkam ban bishar ïa baroh ki jingmudui kiba la pynrung kyrteng bad ban pynlong ïa ka jingtohkit kaba bniah halor jong ki.
Na ka bynta kane, u ophisar u lah ban pan ïa ki jingtip kiba bniah kiba ïadei bad ka jingmudui, ki kot ki sla, ki report, ki jingtip kiba don ha ki kor elektronik (electronic data) bad kino kino kiwei pat ki jingtip na ki bor treikam ba dei khmih.
Lada donkam, yn ailad ïa u nongmudui ban pynpaw ïa ka liang jong u, la ka long da kaba wan mih hi dalade ne lyngba ki lad teknoloji, shwa ban pynkut ïa ka jingtohkit bad shim ïa ka rai kaba khatduh halor ka jingmudui.
Ka jingtohkit halor kano kano ka jingmudui dei ban pyndep hapoh hynñiew sngi naduh ka sngi ba la pdiang ïa ka jingmudui.
Hadien ba la pyndep ïa ka jingtohkit, u Grievance Redressal Officer un buh jingthoh ïa ki jinglap jong u bad shim ïa ki sienjam kiba donkam ban pynbeit ïa ka jingeh katkum ki kyndon jong ka aiñ.
Dei ban pyndep ïa ka jingbishar bad pynbeit ïa kano kano ka jingmudui hapoh 15 sngi naduh ka sngi ba la pdiang ïa ka. Yn buh jingthoh ïa ki jinglap bad ki sienjam ba la shim da u ophisar ba la bynshet, bad yn pyntip ruh sha u nongmudui halor ka jingmih na ka jingbishar.
Ha kaba ïadei bad ki jingmudui kiba la pdiang da ka jingthoh, ïa ki jinglap na ka jingtohkit bad ki sienjam ba la shim yn pyntip sha u nongmudui lyngba ka jingthoh.Ka jingbuddien lyngba ki kor digital bad ka jingkhmih bniah ïa ki jingmudui kiba dang sahteng
Ka rynsan digital kaba la buh na ka bynta ban bishar ïa ki jingmudui kan ailad ïa ki bor ba dei khmih ban buddien ïa ka jinglong jong ka jingmudui naduh ka por ba la pynrung kyrteng haduh ban da pynbeit bad shim ïa ka rai kaba khatduh.
Yn pynsuk ruh ïa ka jinglum bad buh jingtip lyngba ki kor digital halor ka jingtohkit, ki jinglap bad ki sienjam ba la shim. Kane kan ïarap ban pynlong ïa ka rukom treikam kaba khuid, kaba shai bad kaba don ka jingkitkhlieh ha ka jingpynbeit ïa ki jingmudui.
Kino kino ki jingmudui kiba ym lah ban pynbeit hapoh 15 sngi yn phah sha ki bor kiba kham halor lyngba ki lad treikam kiba la buh da ka Sorkar Jylla.
Ki bor ba dei khmih ïa kine ki jingmudui kiba dang sah teng kin bishar ïa ka jinglong jong ka kam bad shim ïa ki sienjam kiba donkam ban pynbeit bad pynkut ïa ki. Yn bteng ruh ban buddien ïa kine ki jingmudui lyngba ki kor digital haduh ban da lah ban pynbeit pura ïa ki.
Kine ki kyndon ki ailad ïa ki paidbah ban buh jingkyrpad ban pyrshah ne pan jingbishar biang halor kano kano ka hukum kaba la pynmih katkum ka rukom treikam ban pynbeit ïa ki jingmudui.
Ïa ki jingkyrpad lah ban buh bad bishar katkum ki kyndon treikam kiba la buh hapoh ka VB–G RAM G Act, 2025.
Lyngba kine ki kyndon thymmai, ka Sorkar Pdeng ka thmu ban wanrah ïa ka rukom treikam kaba pynsuk ïa ki paidbah, bad ban pynthikna ba ïa ki jingmudui kiba la pdiang yn bishar bad pynbeit hapoh ka por ba la buh katkum ki kyndon jong ka VB–G RAM G.
Ki rukom treikam kiba bun kyrdan, ki lad bapher bapher ban buh jingmudui, ka jingpynrung kyrteng katkum ka aiñ, ka por ba la buh ban pynbeit ïa ki jingmudui, ka jingbuddien lyngba ki rynsan digital bad ka rukom bishar kyrpang ïa ki jingmudui kiba dang sah teng kin ïarap ban wanrah ïa ka jingtreikam kaba don ka jingkitkhlieh bad ban pynbha ïa ka rukom pyntreikam ïa kane ka skhim.
Kine ki kyndon ki long ka sienjam kaba kongsan ban pynthikna ba ki jingmudui kiba ïadei bad ka jingpyntreikam ïa ka VB–G RAM G kin ïoh ïa ka jingbishar kaba ryntih, kaba khuid bad kaba biang por, khnang ban pynthikna ba ki longïing ha ki thaiñ nongkyndong kin ïoh ïa ki hok bad ki jingmyntoi kiba dei hok ban ïoh lyngba kane ka skhim.
