Shillong, Naiwieng 02: Ka Hima Khyrim mynta u snem kala pyndep iaka niam ka rukom kaba kila bat naduh ki por u barim bajah bad hadien ka jingleh niam baroh mynta ka sngi, la pynkut da ka shad ka kmen na ki khun ki hajar ki marjan marpa ha kaba da ki spah ngut ki rang bad ki thei samla kila wan ban iashim bynta ha kane ka shad lehniam ha Nongkrem.
Ha kane ka sngi ki paidbah na kylleng ka bri u Hynniew trep kila iapoi sha Smit ban ia sakhi lang ia kane ka shad niam ka Hima Khyrim kaba la ju pynlong man la u snem ia kaba baroh la ia tip kum ka shad Nongkrem.
Ha kane ka sngi na ka liang ka sorkar la wan sakhi lang da u Symbud Myntri Rangbah ka jylla, u bah Sniawbhalang Dhar, la don lang u Myntri ka tnad ka koit ka khiah, u bah Wailadmiki Shylla, ki MDC jong ka KHADC, u Principal Secretary ka tnad elekshon, u Dr. BDR Tiwari.
Haba kren ha ki lad pathai khubor, u Pa’iem Dr. Balajied Syiem u la ong ba kane ka dei ka sngi bakhraw na ka bynta ka Hima bad kane ka dei ka jingleh niam kaba man la u snem bad ia kane, la leh naduh ki por barim bajah na kawei ka pateng sha kawei ka pateng.
U Pa’iem u la ong ba ha kine ki khyndiat sngi la don ka jingkhih khyllep hynrei kam shym la pynthut ia kane ka leh niam leh rukom da ka jingker jingda u nongbuh nongthaw bad kane ka dei ka jingkyrkhu kaba u la theh kyrhai ha kaba u slap u la sangeh ha kaba kila ioh ban pyndep iaka shad ka kmen kaba u nongbuh nongthaw u la buh.
