Shillong, Naiwieng 04: U riew rangbah u ba sngewtynnad ban buh ia ki kali hyndai mynta ka sngi 04/Naiwieng/2026 u la plie paidbah ba kiwei ruh kin lah ban iohi ia ki kali hyndai kiba ym don shuh ki ban iaid ha surok bad ki bym iohi shuh hynrei u bah Ashok Lyngdoh u la buh pynsah nam haduh ar phew tylli ki kali hyndai bad kumjuh ki kali ar shaka.
Haba ia kren bad u SP News Agency u bah Ashok u la ong ba naduh dang rit u don ka jingsngewtynnad ban lum ia ki kali khun jakai bad kane ka jinglong jong u haba u la rangbah u la sngewtynnad ban don da ki kali kiba ha rukom kiba dei ki kali hyndai u la iathuh ba haduh mynta u la thied ar phew tylli ia ki kali hyndai.
Hadien ba u la lum ia kine ki kali naduh ba sdang haduh mynta kala wan ka jingpyrkhat ba kala dei ka por ba plie noh ia ka jaka jngoh kai ba kine ki khynnah ka juk mynta kin iohi ia ki kali kiba hyndai hynthai namar ba kim don shuh ba kin iaid ha surok u la ong ba ym tang ia ki kali hynrei la lum ruh ia ki kali ar shaka kiba naduh hyndai ki Gramophone, ki Typewriter, ki Record Player, bad kiwei kiwei ki tiar hyndai.
U la iathuh khnang ba kan nym don ka jingkhapngiah un buh la kumno kumno tang kumba 50 ne 60 ngut ki briew ki lah ban wan peit kai namar lada shu shah khlem da don kano kano ka jingteh lakam kin don ka jingwit namar ka hap ha lynti shnong bad ka jaka ruh ka long kaba rit khnang ba ki nongwan peitkai kin ioh ban peit da kaba hun mynsiem yn hap ban buh da u pud ia ka jingwan jong ki briew.






