Shillong, Naiwieng 14: Ka North Eastern Electric Power Corporation Limited (NEEPCO) da ka jingjop ka la ïoh ban pynlong ïa ka jingïakob ai-rong ha ka kyrdan jong ka Jylla halor ka phang, Energy Conservation 2026 hynne ka sngi ka 13 tarik u Naiwieng 2026, ha ka ophis corporate treikam ka jong ka, kaba don ha Brookland Compound, Shillong, Meghalaya.
Kane ka jingïakob ka la sakhi ïa ka jingïashimbynta jong 100 ngut ki khynnah pule na ar tylli ki kyrdan kata ka Group A ba kynthup ïa ki khynnah pule (Class V–VII) bad ka Group B (Class VIII–X), kiba lah shah jied lyngba ki kyrdan jingjied ha ki kylla ba lah dep.
Ba la pynlong hapoh jong ka tnad ba dei peit ka Ministry of Power, jong ka Sorkar India, kane ka sienjam ka thmu ban pynsngewthuh ïa ki khynnah skul ïa ka jingdonkam jong ka jingpynneh pynsah bad ka jingïada ïa ki bor ba ïoh na ka Mariang lyngba ki jingpyni jingpynpaw bad ka jingnang jingtbit jong ki ban thaw bad pynwandur.
Ïa kane ka program la wan ban sakhi da u Bah C. Kharkrang, u Consultant (Techno-Commercial), jong ka Meghalaya State Electricity Regulatory Commission (MSERC), Shillong, kum u Kongsan ha ryngkat bad u Shri Kamran Shaikh, u Director, Bureau of Energy Efficiency (BEE), New Delhi, kiba la ïashimbynta lang ha kane ka progkram.
La sakhi ruh ïa ki jingkren ba kynthup na u Shri Samiran Sinha Ray, u Chief Human Resources Officer (CHRO), jong ka NEEPCO, bad u Shri B. Maharana, uba dei u Chief Financial Officer (CFO), jong ka ophis treikam ka NEEPCO hi.
Ha ka kyrdan jong ka Group A (Class V–VII), u Nishan Das jong ka Class V u la ïoh ïa ka kyrdan banyngkong, bad u Adamya Priyam Handique ba pule ha ka Class VI pat u la wan ha ka kyrdan kaba ar bad ka Minaksi Sukla Baidya jong ka Class VII pat ha ka kyrdan kaba lai.
Na ka Group B pat (Class VIII–X), u Smaran Nath ba pule ha ka Class X u la wan ha ka kyrdan banyngkong katba u Aayush Das jong ka Class VIII u la ïoh ïa ka kyrdan ba ar bad u Progyan Das Baruah jong ka Class IX pat u la jop ïa ka kyrdan kaba lai.
Kane ka jingïakob ka la plie ïa ka rynsan na ka bynta ki khynnah pule ba kin sei madan ïa la ki sap bad ka jingsngewthuh jong ki halor ka jingpynneh pynsah bad ka jingïada ïa ki bor ba ïoh na ka Mariang ha ryngkat ka jingpynshlur ba kin pyndonkam ïa ki bor ba ïoh na ka Mariang ha kata ka rukom kaba don artad ïa ka jingkitkhlieh, ha ka jingim jong ki kaba man la ka sngi.
