Tura, Naiwieng 14: Ka 50th Hundred Drums Wangala Festival kala ioh rung ha ka Guinness World Records lem bad ka jingia tem iaki drum 1000 tylli ha ka jingrakhe iaka jingdap 50 snem.
Katei ka jingrakhe iaka jingdap 50 snem jong kane ka 50th Hundred Drums Wangala Festival kala kut noh mynta ka sngi ha Garo Heritage Village, Wangala A-dam, Chibragre, West Garo Hills, lem bad ka Hundred Drums Wangala Festival Committee, India, kaba la iohrung ruh ha ka Guinness World Records na ka bynta ka Largest Wangala Dance.
Ha kane ka tamasa, kumba 1,000 tylli ki nongtem drum kila tem ha ka Rhythm of Thousand Drums, ryngkat ki kynthei ba dei ki nongshad bad ki riewshlur, kaba bud da ka jingshad ba kyrpang ka Wangala na ka bynta ban iohrung ha katei ka rynsan Guinness World Records, katba u nongbishar, u Richard Williams Stenning na United Kingdom u la dep pynbna ia kane ha katei ka jaka ba pynlong ia kane ka tamasa. Ka kynhun ba don 12 ngut ki dkhot na Garo Hills kala iashim bynta lang ban bishar ha kane ka tamasa.
Katba iaka jingpyn kut ia kane ka tamasa, la ai jingkren da u Gajendra Singh Shekhawat, Myntri sorkar pdeng ka kam jngoh kai pyrthei ka sorkar India, uba dei ruh u kongsan, ryngkat u Myntri Rangbah ka jylla Meghalaya, u Conrad K. Sangma. U bah Sniawbhalang Dhar, u Symbud Myntri; u T. D. Shira, Myntri ka kam bording bad u Dr. Mukul M. Sangma, Myntri ka liang pyrshah, ha kaba kila ia don bynta lang kum ki kongsan, lem bad kiwei kiwei ki riewpawkhmat.
Ha ka jingai jingkren, u Myntri ka sorkar pdeng, u la ai khublei da kaba kren ha ka jaka jong u Myntri Rangbah duh ka Ri India bad ki paidbah ka Ri India ha ka jingdap 50 snem kane ka tamasa.
U la batai ba ka tamasa Wangala ka dei ka jingleh kmen ka niam Wangala ha ri Garo ka long kum ka jingai khublei bad jingkhublei nguh iaka mariang na ka bynta ka jingmih ha kaba bun, katba ka sorkar pdeng kala pynpaw iaka mon ban kyrshan iaka jylla ban kyntiew iaka ri Garo kum ka jaka peitkai bad kyntiew iaki samla.
U Conrad u la ai khublei ia u Myntri ka sorkar pdeng, ki nongpyniaid bad ki nongiashim bynta ba ia shad bad pynkynmaw ba kane ka tamasa kaba la sdang ha u 1976 bad 20 tylli ki drum bad hadien kala kiew sha ka 100, hynrei mynta kala kiew sha ka 1,000 tylli ki drum ha kane ka jingrakhe iaka jingdap 50 snem, kaba long ka jingpyn urlong iaka jingiohi jngai jong u P. A. Sangma, bam kwai ha dwar u blei.
Katba u Symbud Myntri bad u Myntri ka liang pyrshah kila ai khublei ia kane ka imlang ka sahlang na ka bynta ka jingpyn neh pynsah ia kane ka tamasa la don mynta 50 snem.
Ha katei ka sngi, la don ka jingiakop shad hapdeng ki shiphew ngut ki nongiashim bynta. Ka Chidaogre kala long ka nongjop bad kala ioh iaka khusnam T. 2 lak, katba ka Gondenggre kala wan ha ka kyrdan ba nyngkong bad ka khusnam T. 1.5 lak bad ka Sadolbra kala wan ha ka kyrdan ba ar bad ka khusnam T. 1 lak. Kiwei kiwei ki nongiashim bynta kila ioh da ki jingai ba kyrpang.
